Հայ հիմնադիրներով Netris-ը ներգրավել է 15 մլն դոլար․ ընկերությունը ցանկանում է դառնալ AI ենթակառուցվածքների ցանցային ավտոմատացման առաջատարը
Արհեստական բանականության (AI) ենթակառուցվածքների համար ցանցային ավտոմատացման ծրագրային լուծումներ մշակող և հայ հիմնադիրներ ունեցող Netris ընկերությունը հայտարարել է 15 միլիոն դոլարի չափով Series A ներդրումային փուլի ավարտի մասին։ Ներդրումը գլխավորել է աշխարհի ամենահայտնի վենչուրային հիմնադրամներից մեկը՝ Andreessen Horowitz (a16z)-ը։
Netris-ը հիմնադրվել է 2018 թվականին Տիգրան Մարտիրոսյանի, Արսեն Առաքելյանի և Ալեքս Սարոյանի կողմից։ Ընկերության նպատակն էր հասանելի դարձնել այնպիսի ցանցային ավտոմատացման տեխնոլոգիաներ, որոնք նախկինում կիրառվում էին հիմնականում խոշոր ամպային ծառայություններ մատուցողների կողմից և պահանջում էին մեծ ինժեներական ռեսուրսներ։ Այսօր ընկերության գլխավոր գրասենյակը գտնվում է ԱՄՆ-ի Կալիֆոռնիա նահանգի Սանտա Կլարայում։
Վերջին ութ տարիների ընթացքում Netris-ը մշակել է տեխնոլոգիա, որը ավտոմատացնում է ամպային ենթակառուցվածքների ամենաբարդ բաղադրիչներից մեկը՝ ցանցերի կառավարումը։ Ընկերության ղեկավարության խոսքով՝ սկզբնական շրջանում շուկան թերահավատ էր նման լուծման նկատմամբ, սակայն ժամանակի ընթացքում երկրորդ և երրորդ մակարդակի ամպային օպերատորներն ու ծառայություններ մատուցողները սկսեցին ակտիվորեն ներդնել Netris-ի հարթակը՝ հաստատելով դրա արդյունավետությունն ու պահանջարկը։
Արհեստական բանականության ոլորտի արագ զարգացումը նոր հնարավորություններ է բացել ընկերության համար։ Խոշոր GPU կլաստերների կառավարումը պահանջում է միաժամանակ վերահսկել ներքին, արտաքին, հյուրընկալող և եզրային ցանցերը, ինչպես նաև ապահովել տարբեր տեխնոլոգիաների համատեղ աշխատանքը։ Netris-ում նշում են, որ հենց այս խնդիրների լուծման վրա են աշխատել տարիներ շարունակ, ինչի շնորհիվ այսօր կարողանում են առաջարկել AI ենթակառուցվածքների համար պատրաստ լուծումներ։
Ընկերությունը համագործակցում է ոլորտի խոշոր խաղացողների հետ, այդ թվում՝ NVIDIA, Hewlett Packard Enterprise, Red Hat, Mirantis, Rafay և vCluster ընկերությունների։ Netris-ի տեխնոլոգիաները կիրառվում են AI ամպային հարթակներում, ինքնիշխան արհեստական բանականության նախագծերում և այսպես կոչված AI գործարաններում։
Ընկերության ներկայացրած տվյալներով՝ վերջին 12 ամիսների ընթացքում տարեկան կրկնվող եկամուտը (ARR) աճել է 800 տոկոսով, իսկ Netris-ն արդեն իրականացրել է ավելի քան 35 գործող AI կլաստերների տեղակայում։ Ընկերությունը նշում է, որ այս ցուցանիշը գերազանցում է ցանցային ավտոմատացման ոլորտում գործող մյուս մատակարարների համատեղ արդյունքները։
Series A ներդրումային փուլի շրջանակում Netris-ի տնօրենների խորհրդին կմիանա Գուիդո Ապենցելլերը։ Խորհրդում արդեն ընդգրկված են նաև a16z-ի գործընկերներ Մարտին Կասադոն և Ռագու Ռաղուրամը, որոնք մասնակցել են տվյալների կենտրոնների ժամանակակից ցանցային տեխնոլոգիաների զարգացմանը։
Netris-ում վստահ են, որ AI ենթակառուցվածքների շուկան դեռ միայն ձևավորման փուլում է։ Ընկերության հաճախորդների թվում արդեն կան 10 հազարից մինչև 100 հազար GPU ներառող կլաստերներ, իսկ դրանց ծավալներն ու բարդությունը շարունակաբար աճում են։ Ընկերությունում համոզված են, որ հենց այս միտումն էլ առաջիկա տարիներին կդառնա Netris-ի հետագա աճի հիմնական շարժիչ ուժերից մեկը։
