Ֆրանսիայի մշակույթի նախկին նախարարը հրաժարական է տվել իր ներկայիս պաշտոնից Էփշտեյնի հետ ունեցած կապերի պատճառով
Ֆրանսիայի մշակույթի նախկին նախարար Ժակ Լանգը հրաժարական է տվել Փարիզի մշակութային կենտրոնի ղեկավարի պաշտոնից՝ սեռական հանցագործությունների համար դատապարտված Ջեֆրի Էփշտեյնի հետ ունեցած կապերի պատճառով, հայտնում է France 24-ը։
Լանգը, որը 2013 թվականից ղեկավարում էր Արաբական աշխարհի ինստիտուտը (IMA), համարվում է Ֆրանսիայի ամենահայտնի հանրային գործիչը, որը ներգրավված է նյույորքցի մանկապիղծ բիզնեսմենի անձնական հաղորդագրությունների վերջին հրապարակման մեջ։
«Պատրաստվում եմ հրաժարական տալ տնօրենների խորհրդի հաջորդ նիստում», — գրել է 86-ամյա քաղաքական գործիչը արտաքին գործերի նախարար Ժան-Նոել Բարոյին ուղղված նամակում՝ ԱԳՆ կանչվելու նախօրեին։
Հրաժարականի առաջարկը հնչել է այն բանից հետո, երբ ուրբաթ օրը Ֆրանսիայի դատախազությունը հայտարարեց Լանգի և նրա դստեր՝ Կարոլինի դեմ նախնական գործի հարուցման մասին՝ «հարկերից դիտավորությամբ խուսափելու և եկամուտների լվացման» մեղադրանքով, երբ նրանց անունները հիշատակվեցին Էփշտեյնի հետ կապված փաստաթղթերում։
Բարոն լրագրողներին հայտնել է, որ ընդունել է Լանգի առաջարկը և նախատեսում է սկսել IMA-ի ժամանակավոր ղեկավարի նշանակման գործընթացը։
Հրաժարական տալուց առաջ Լանգը հայտարարել է, որ իր դեմ առաջադրված մեղադրանքները «անհիմն» են և որ նա ողջունում է հետաքննությունը։
86-ամյա Լանգը հերքում է որևէ իրավախախտում՝ նշելով, որ ապշել է, երբ իր անունը հայտնվել է օֆշորային ընկերության կանոնադրության մեջ 2016 թվականին, և որ Էփշտեյնին դիմել է միայն որպես բարեգործ։
