Եթե Թուրքիան ցանկանում է միանալ ԵՄ-ին, ապա Գերմանիայում կգտնի հուսալի և բարեկամական գործընկեր. Գերմանիայի արտգործնախարար
Թուրքիան Գերմանիայի ռազմավարական գործընկերն է և լավ բարեկամը բոլոր արտաքին քաղաքականության հարցերում, հայտարարել է Գերմանիայի արտաքին գործերի նախարար Յոհան Վադեֆուլը՝ Anadolu-ի փոխանցմամբ։
Խոսելով Թուրքիայի ԵՄ անդամակցության մասին՝ արտգործնախարարը նշել է, որ և՛ Թուրքիան, և՛ ԵՄ-ն պետք է որոշակի նպատակներ կատարեն: «Մենք ցանկանում ենք առաջընթաց ԵՄ-Թուրքիա հարաբերություններում: Մենք ցանկանում ենք, որ մաքսային միությունը վերականգնվի: Մենք ցանկանում ենք առանց վիզայի ճանապարհորդություն: Ընդհանուր առմամբ, մենք ցանկանում ենք դրական օրակարգ: Եթե Թուրքիան իսկապես ցանկանում է միանալ ԵՄ-ին, ապա Գերմանիայում կգտնի հուսալի և բարեկամական գործընկեր»:
Վադեֆուլը շեշտել է, որ իր համար կարևոր է տեսնել Թուրքիայի վճռականությունն ու լրջությունը ԵՄ-ին անդամակցելու նրա մտադրություններում՝ նշելով, որ այս գործընթացը հեշտ չի լինի և չի կարող ավարտվել մի քանի շաբաթում կամ ամսում։
