Իսրայելի ռազմավարական պլանավորման նախարարը Թրամփին ներկայացրել է Գազա քաղաքը գրավելու ծրագիրը
Իսրայելի ռազմավարական պլանավորման նախարար Ռոն Դերմերը Սպիտակ տանն ԱՄՆ նախագահ Դոնալդ Թրամփի հետ կայացած հանդիպման ժամանակ անդրադարձել է Գազա քաղաքը գրավելու ծրագրին։ Այս մասին հաղորդում է Axios-ը՝ հղում անելով իր աղբյուրներին։
Աղբյուրների համաձայն՝ Դերմերը հայտնել է, որ Իսրայելը չի ցանկանում երկար ժամանակով օկուպացնել Գազան, սակայն անկլավը կառավարելու համար անհրաժեշտ է ընդունելի այլընտրանք ՀԱՄԱՍ-ին։
ԱՄՆ նախագահ Դոնալդ Թրամփն օգոստոսի 27-ին հանդիպում էր անցկացրել Մեծ Բրիտանիայի նախկին վարչապետ Թոնի Բլեյրի, իր փեսա գործարար Ջարեդ Քուշների և Իսրայելի ռազմավարական պլանավորման նախարար Ռոն Դերմերի մասնակցությամբ, որի նպատակն էր քննարկել Գազայի հետպատերազմյան ծրագիրը։ Հանդիպմանը ներկա են եղել ԱՄՆ փոխնախագահ Վենսը, պետքարտուղար Մարկո Ռուբիոն, հատուկ բանագնաց Սթիվ Ուիթքոֆը և այլ բարձրաստիճան պաշտոնյաներ։
Քուշները և Բլեյրը ներկայացրել են գաղափարներ, որոնք նրանք նախկինում քննարկել էին Ուիթքոֆի և այլ պաշտոնյաների հետ։
«Նրանք փորձել են պատկերացում տալ, թե ինչպես կարելի է կառավարել Գազան և ինչպես ստեղծել ներդրումների համար միջավայր, որպեսզի վերակառուցումը կարողանա տեղի ունենալ»,- հայտնում է պորտալը։
«Նպատակն այն է, որ ԱՄՆ-ն գլխավորի Գազայում միջազգայնորեն ճանաչված կառավարման կառուցվածքի որոնումները, որը թույլ կտա Իսրայելին դուրս բերել իր զորքերն՝ առանց անվտանգության առումով հին իրականությանը վերադառնալու», – պորտալը մեջբերում է աղբյուրներից մեկի խոսքերը։
Աղբյուրների տեղեկացմամբ՝ Սպիտակ տանը կայացած հանդիպումը որևէ հստակ որոշումով չի ավարտվել, և հիմնական հարցը մնացել է այն, թե ով կկարողանա ստանձնել Գազայի կառավարումը ՀԱՄԱՍ-ի փոխարեն։
Օգոստոսի 8-ին Իսրայելի ռազմաքաղաքական կաբինետը հաստատել է Գազա քաղաքն ամբողջությամբ վերահսկողության տակ վերցնելու և պաղեստինյան անկլավում գործողությունը ընդլայնելու ծրագիրը:
Օգոստոսի 18-ին ՀԱՄԱՍ-ը դրականորեն է արձագանքել միջնորդների հրադադարի առաջարկին, և փաստաթուղթը հետագայում փոխանցվել է Իսրայելին:
