Հայտնի է Վարդան Սեդրակյանի գործով առաջին դատական նիստի օրը
Վարդան Սեդրակյանի գործով առաջին դատական նիստը տեղի կունենա մայիսի 14-ին: Այս մասին 168.am-ին տեղեկացրին Երևանի կենտրոն և Նորք-Մարաշ վարչական շրջանների ընդհանուր իրավասության դատարանից: Գործով նախագահող դատավորը Գագիկ Պողոսյանն է:
Հիշեցնենք, որ նախագահի նախկին թեկնածու Վարդան Սեդրակյանը մեղադրվում է մեկ այլ թեկնածու Պարույր Հայրիկյանի սպանությունը պատվիրելու մեջ: Բացի Վարդան Սեդրկյանից՝ մեղադրվում են նաև Խաչատուր Պողոսյանն ու Սամվել Հարությունյանը: Երեքի նկատմամբ էլ որպես խափանման միջոց է ընտրվել կալանավորումը:
Ըստ datalex.am տեղեկատվական համակարգի, համաձայն մեղադրական եզրակացության, Համաձայն մեղադրական եզրակացության, Վարդան Սեդրակյանին մեղադրանք է առաջադրվել այն բանի համար, որ նա, առաջադրվելով 2013-ի փետրվարի 18-ին կայանալիք ընտրություններում ՀՀ նախագահի թեկնածու, քարոզարշավի րնթացքում, իր մտերիմներ Սամվել Հարությունյանին և Խաչատուր Պողոսյանին 2013-ի հունվարի սկզբներին պատվիրել է «Ազգային Ինքնորոշում Միավորում» կուսակցության առաջնորդ, ՀՀ նախագահի մեկ այլ թեկնածուի, քաղաքական գործիչ Պարույր Հայրիկյանի սպանությունը` նրա քաղաքական գործունեությունը դադարեցնելու նպատակով, որն իրականացնելու նպատակով Վարդան Սեդրակայանը զենք ձեռք բերելու համար հանցակիցներին է տվել 1000 դոլար, ինչը Խաչատուր Պողոսյանը և Սամվել Հարությունյանը հավասարապես կիսել են միմյանց միջև։
Սակայն, ըստ մեղադրական եզրակացության, ծրագրված հանցագործությունն իրականացնելու համար Խաչատուր Պողոսյանն օգտագործել է իր կողմից 1995-1996-ին ապօրինի կերպով ձեռք բերված և պահված 1941թ. գործարանային արտաղրության 7,62մմ տրամաչափի «HG 201» համարի «Նագան» տեսակի թմբուկավոր ատրճանակը:
Գործով մյուս մեղադրյալ 1996թ. ծնված Խաչատուր Պողոսյանին մեղադրանք է առաջադրվել այն բանի համար, որ նա, 1995-1996թթ. ՀՀ Բագրատաշեն համայնքի տարածքում քննությամբ չպարզած անձից ապօրինի կերպով ձեռք է բերելով` 1941թ. գործարանային արտադրության 7.62մմ տրամաչափի «HG 201» համարի «Նագան» տեսակի թմբուկավոր ատրճանակ և այդ ատրճանակից կրակելու համար նախատեսված` 9 հատ 7.62մմ տրամաչափի փամփուշտներ, մինչև 2013թ. հունվարի 31-ը դրանք ապօրինի կերպով պահել է տանը:
Գործով մեղադրյալ 1972-ի ծնված Սամվել Հարությունյանին մեղադրանք է առաջադրվել այն բանի համար, որ նա իր ընկերոջ՝ Խաչատուր Պողոսյանի հետ, ՀՀ նախագահի՝ 2013-ի փետրվարի 18-ի ընտրություններում ՀՀ նախագահի թեկնածու Վարդան Սեդրակյանից 2013-ի հունվարի սկզբներին ստանալով պատվեր՝ «Ազգային ինքնորոշում միավորում» կուսակցության առաջնորդ, ՀՀ նախագահի մեկ այլ թեկնածու, քաղաքական գործիչ Պարույր Հայրիկյանի սպանությունն իրագործելու վերաբերյալ, նրա քաղաքական գործունեությունը դադարեցնելու նպատակով, տվել են իրենց համաձայնությունը և զենք ձեռք բերելու համար Վարդան Սեդրակյանից ստացել է 1000 դոլար գումար:
Հ.Գ. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
