Իվանիշվիլին ակտիվները տուն է տեղափոխում. iFact
«Պատժամիջոցների ենթարկված օլիգարխ Իվանիշվիլին ակտիվները տուն է տեղափոխում». այս վերտառությամբ համատեղ հոդված են հրապարակել հետաքննող լրագրողների iFact միությունը, Կազմակերպված հանցավորության և կոռուպցիայի հաշվետվությունների գործակալությունը (OCCRP) և «Կառավարման մոնիտորինգի կենտրոն»-ը (Gmc): Այս մասին գրում է aliq.ge-ն։
Հոդվածում հեղինակները քննարկում են այն ռիսկերը, որոնց կարող է բախվել վրացական տնտեսությունը, եթե «Վրացական երազանք»-ի հիմնադիր, պատվավոր նախագահ և օլիգարխ Բիձինա Իվանիշվիլին, պատժամիջոցներից վախեցած, իր ակտիվները տեղափոխի Վրաստան:
Ըստ Enmetena Advisory քաղաքական ռիսկերի խորհրդատվական ընկերության հիմնադիր Մաքսիմիլիան Հեսի՝ Իվանիշվիլիի ակտիվների վերակազմավորումը կարող է ավելի մեծ խնդիրներ ստեղծել Վրաստանի համար, եթե միլիարդատիրոջ դեմ պատժամիջոցները խստացվեն: Նա բացատրել է, որ նման սցենարի դեպքում բիզնեսի համար կարող է «շատ դժվար» դառնալ երկրի հետ համագործակցությունը, քանի որ պատժամիջոցների ռիսկը կմեծանա Իվանիշվիլիի տնտեսական ազդեցության պատճառով։ Հեսի խոսքով, Իվանիշվիլիի ակտիվները կկազմեն Վրաստանի ընդհանուր տնտեսության հսկայական բաժինը:
Իվանիշվիլիի ակտիվների զգալի մասը վերանվանվել է մեկ օրում՝ հունվարի 17-ին։ Այդ օրը յոթ ընկերությունների սեփականությունը պանամական Limestone Finance International SA ընկերությունից փոխանցվել է Իվանիշվիլիի վրացական JSC Terra ընկերությանը։
«Չնայած Իվանիշվիլիի վրացական որոշ ակտիվների վերջին վերակազմավորմանը, նրա հետ կապված այլ նշանակալի հոլդինգներ շարունակում են մնալ օֆշորային սեփականության տակ: Դրանցից մի քանիսը պատկանում են Վրաստանի համաներդրումային հիմնադրամին (GCF Fund), մասնավոր ներդրումային հիմնադրամ, որը կառավարում է ավելի քան 2 միլիարդ դոլարի ակտիվներ երկրի տնտեսության մեջ, ներառյալ հիդրոէներգետիկ նախագծերը, շքեղ հյուրանոցները և ցեմենտի գործարանը» , — գրել են հոդվածի հեղինակները:
«Թրանսփարենսի Ինթերնեշնլ Վրաստան»-ի զեկույցում նշված է, որ հունվարին Իվանիշվիլիի կնոջ՝ Էկատերինե Խվեդելիձեի անմիջական սեփականության ներքո ստեղծվել է նոր անկախ կազմակերպություն՝ JSK GCF Georgia-ն, առանց որևէ կապի արտերկրում:
Անցյալ տարվա ապրիլի 19-ին «Վրացական երազանք» կուսակցությունը, վկայակոչելով տնտեսական օգուտները, արագացված փոփոխություններ մտցրեց Հարկային օրենսգրքում։ Այս փոփոխություններով հարկային արտոնությունները կտարածվեն օֆշորային գոտիներից Վրաստան տեղափոխվող բիզնեսների վրա։ Կառավարության ընդդիմախոսների կարծիքով` օլիգարխի կուսակցությունը օրենքը հարմարեցրել է Իվանիշվիլիի շահերին և կապված է սպասվող պատժամիջոցների ակնկալիքների աճի հետ։
Ֆինանսների նախարարության հրապարակած 2025 թվականի հունվարի արտահանման-ներմուծման տվյալների համաձայն՝ 2025 թվականի հունվարին Վրաստան են ներկրվել 480 մլն 658 հազար 330 ԱՄՆ դոլարի նկարներ, որոնք, ամենայն հավանականությամբ, առնչվում են Իվանիշվիլիին։ Փորձագետների կարծիքով, չնայած ներմուծման աճին, ԱԱՀ-ն, գույքահարկը և այլ հարկերը չեն ավելացել, ինչը վկայում է այն մասին, որ Իվանիշվիլին օգտվել է հենց «օֆշորային օրենք»-ով իրեն նախատեսված հարկային արտոնություններից և բյուջե չի վճարել մոտավորապես 80 մլն դոլար։
