#ՀԻՄԱ.UWC Դիլիջանը նշում է հիմնադրման տասնամյակը. Հոբելյանական միջոցառումը.#ՈՒՂԻՂ

UWC Դիլիջանն այսօր նշում է հիմնադրման տասնամյակը:

UWC Դիլիջանը Միացյալ համաշխարհային քոլեջներ (United World Colleges) միջազգային ցանցի 18 դպրոցներից մեկն է, առաջին UWC դպրոցը հետխորհրդային տարածքում և Մերձավոր Արևելքում։

UWC Դիլիջանը հիմնադրվել է բարերարներ Ռուբեն Վարդանյանի ու Վերոնիկա Զոնաբենդի կողմից, որոնց համար կրթությունը միշտ ունեցել է առաջնահերթ նշանակություն: Նրանց տեսլականն էր Հայաստանի՝ որպես միջազգային կրթական և մշակութային կենտրոնի զարգացումը: UWC Դիլիջանի շնորհիվ հայ երեխաները ստանում են միջազգային չափանիշներին համապատասխան կրթություն, իսկ Դիլիջանում ուսանած оտարերկրացիները դառնում են Հայաստանի «դեսպանները»:

Թվեր և փաստեր

2014թ. Դիլիջանի միջազգային դպրոցն իր դռները բացեց 49 երկրից 94 ուսանողի համար:

2024թ., տասը տարի անց, դպրոցն ունի 917 շրջանավարտ 120 երկրից: Շրջանավարտների 98 տոկոսն ընդունվել է աշխարհի լավագույն բուհեր:

Այս տարիների ընթացքում 160 հայ երիտասարդ որակյալ կրթութուն ստանալու հնարավորություն է ունեցել UWC Դիլիջանում և ցանցի մյուս դպրոցներում: Շուրջ 98 տոկոսը սովորել է անվճար՝ դպրոցի հովանավորների կողմից, այդ թվում՝ Վարդանյան ընտանիքից տրամադրված կրթաթոշակներով:

Դպրոցի շինարարության արժեքը կազմել է 180 մլն ԱՄՆ դոլար, որի գերակշիռ մասը ներդրել է Վարդանյան ընտանիքը:

UWC Դիլիջանի ստեղծումով բացվել է 1700 ժամանակավոր և շուրջ 300 մշտական աշխատատեղ։

UWC Դիլիջանը մեծ ազդեցություն է ունեցել քաղաքի զարգացման վրա: Օտարերկրացի ուսանողների ընտանիքների ու հարազատների համար Դիլիջանը դարձել է սիրված այցելավայր, աստիճանաբար քաղաքում ստեղծվել են ինչպես զբոսաշրջային, այնպես էլ կրթական նոր ենթակառուցվածքներ:

Դիլիջանն ընդգրկվել է ՅՈՒՆԵՍԿՕ-ի կրթական քաղաքների ցանցում:

Ձևավորվել է արդյունավետ համագործակցություն UWC Դիլիջանի և համայնքի միջև: Համայնքի երեխաներն այցելում և մասնակցում են դպրոցում կազմակերպվող միջոցառումներին, իսկ քաղաքում գործող Համայնքային կենտրոնում UWC Դիլիջանի ուսանողներն անվճար անգլերենի դասընթացներ են կազմակերպում թե երեխաների, և թե մեծահասակների համար:

UWC Դիլիջանի կամպուսը նախագծվել է անվանի բրիտանացի ճարտարապետ Թիմ Ֆլինի կողմից: Դպրոցի գերժամանակակից ճարտարապետությունը մի շարք մրցանակներ է բերել Հայաստան, մասնավորապես՝

Էկոլոգիական շինարարության ստանդարտի վկայական՝ BREEAM 2015
2015 GRA GREEN ROOF LEADERSHIP մրցանակը՝ «Trend Setting Architecture» անվանակարգում
2015 EUROPEAN PROPERTY AWARD մրցանակը՝ «Public Service Development» անվանակարգում
2016 FIABCI World Prix d’Excellence մրցանակը՝ «Public Infrastructure» անվանակարգում։

2017 Build School Silver Award՝ շինարարության բարձր որակի համար:

«Ինչ-որ փուլում ես հասկացա, որ մարդկության ապագան կախված է կրթությունից, որ դա կլինի աշխարհի հաջողության առանցքային տարր: Եթե ես հավատում եմ, որ կրթությունն աշխարհի ապագան է, ապա նշանակում է, որ պետք է կրթության մեջ ներդնեմ իմ ժամանակը, ջանքներն ու միջոցները»,-տարիներ առաջ ասել էր Ռուբեն Վարդանյանը: