Ֆրանսիան և ԱՄՆ-ն կշարունակեն համատեղ ջանքերը Մերձավոր Արևելքում լարվածության թուլացման համար
Ֆրանսիան և Միացյալ Նահանգները պարտավորվել են Մերձավոր Արևելքում շարունակել իրենց համատեղ ջանքերը՝ լարվածությունը թուլացնելու և տարածաշրջանային բռնկումից խուսափելու համար:
Այս մասին նշված է ԱՄՆ և Ֆրանսիայի նախագահներ Ջո Բայդենի և Էմանուել Մակրոնի հանդիպման արդյունքներով Սպիտակ տան պաշտոնական կայքում հրապարակված համատեղ հայտարարության մեջ:
Դրանում Ֆրանսիան և Միացյալ Նահանգները կոչ են անում անհապաղ հրադադար հաստատել Գազայում և կրկնում, որ բոլոր պատանդները պետք է անհապաղ ազատ արձակվեն՝ առանց նախապայմանների։
Նախագահները կրկին խորը մտահոգություն են հայտնել Գազայում սարսափելի հումանիտար ճգնաժամի վերաբերյալ՝ կոչ անելով կենսականորեն անհրաժեշտ մարդասիրական օգնություն տրամադրել խաղաղ բնակչությանը և անխոչընդոտ, կայուն մարդասիրական մուտք ապահովել Գազա և նրա ներքին բոլոր ուղիներով:
Բայեդնն ու Մակրոնը նաև կրկնել են պաղեստինցի քաղաքացիական անձանց և մարդասիրական աշխատողների արդյունավետ պաշտպանության համար Իսրայելի կողմից ավելին անելու անհրաժեշտության մասին:
Նրանք վերահաստատել են իրենց հավատարմությունը խնդրի՝ երկու պետությունների ձևաչափով լուծման վերաբերյալ, որը միակ ճանապարհն են համարում իսրայելցիների և պաղեստինցիների միջև կայուն խաղաղություն ապահովելու համար:
ԱՄՆ և Ֆրանսիայի առաջնորդները մասնավորապես ընդգծել են Լիբանանի կայունության պահպանման և Կապույտ գծում լարվածության թուլացման կարևորությունը, որին հասնելու նպատակով կաշխատեն միասին:
Երկու երկրներն էլ կոչ են անում բոլոր կողմերին ցուցաբերել առավելագույն զսպվածություն և պատասխանատվություն՝ համահունչ ՄԱԿ-ի ԱԽ 1701 բանաձևի:
Այս համատեքստում Ֆրանսիան և ԱՄՆ-ն ընդգծում են Լիբանանում 18-ամսյա նախագահական վակուումին վերջ դնելու, նախագահի ընտրության, կառավարության ձևավորման և անհրաժեշտ բարեփոխումների իրագործման հրատապությունը՝ լիբանանյան տնտեսությունը կայունացնելու, վերականգնման հիմքեր դնելու և կայուն ներառական աճի համար:
