«Իմնեմնիմի»-ն նույն ժամերին լինելու է եթերում. Սամսոնյանը հատուկ խնդրեց շնորհակալություններ փոխանցել. Մելիքյան
Հասարակական գործիչ Նարեկ Սամսոնյանի պաշտպան Ռուբեն Մելիքյանը գիշերը Արմավիր ՔԿՀ-ում տեսակցել է նրան։
Տեսակցելուց հետո ֆեյսբուքյան ուղիղ եթերում Մելիքյանն ասել է. «Նարեկ Սամսոնյանի կամքը, վճռականությունը, տեղն է, և բնաբանաբար այս քաղաքական հետապնդումը որևէ կերպ չի ազդել Սամսոնյանի տրամադրվածության վրա, ընդհակառակը՝ ավելի համոզված է իր համոզմունքներում, որոնց դուք Սամսոնյանի հրապարակային խոսքից, գործողություններից:
Երկրորդը` Սամսոնյանը հատուկ խնդրեց մի քանի շնորհակալություններ փոխանցել. առաջինը բոլոր այն մարդկանց, որոնք դատարանի, քննչականի, ոստիկանության առջև են եղել և իրենց ներկայությամբ իրենց համերաշխությունն են հայտնել Նարեկին և Վազգենին…։
Հատուկ շնորհակալություն է հայտնել մեդիայի ներկայացուցիչներին, որոնք բարձր եւ խիտ ինտենսիվությամբ լուսաբանել են այս խայտառակ հետապնդումը, որ ակնհայտ քաղաքական բնույթ ուներ: Մենք ականատես եղանք ծանր վիրավորանքի հանցակազմի վերածնունդին, նորից դաշտ մտնելուն՝ առանց Ազգային ժողով մտնելու
Հատուկ շնորհակալություն հանրային գործիչներին, քաղաքական դերակատարներին, քաղաքական ներկապնակի տարբեր ուղղության գործիչներին»։
Ռուբեն Մելիքյանը նաեւ հայտարարեց, որ «Իմնեմնիմի»-ն շարունակվելու է. «Ես տեղեկացա, որ նույն օրերին, նույն ժամերին այն լինելու է եթերում, իհարկե, Նարեկը չի լինի, նա երկամսյա կալանքի ներքո է, Վազգենի մասով որոշումն այսօր է հրապարակվելու»:
Հիշեցնենք, որ «Իմնեմնիմի» պոդքասթի հեղինակներ Նարեկ Սամսոնյանին ու Վազգեն Սաղաթելյանին ազատությունից զրկել են հաղորդման ժամանակ հայհոյանքներ հնչեցնելու համար։ Փաստաբանները նշում են, որ սա ծանր վիրավորանքի քրեականացման վերածնունդն է, իսկ իրականում՝ քաղաքական հետապնդում Նիկոլ Փաշինյանի ընդդիմախոսների նկատմամբ։
Նախօրեին դատարանը որոշեց Ն.Սամսոնյանը 2 ամիս կալանավորել է, Վազգեն Սաղաթելյանի խափանման միջոցի վերաբերյալ դատարանի որոշումը կհրապարակվի այսօր ժամը 11։00-ին։
