Վրաստանի քաղաքացիների որոշ անձնագրերում փոփոխություններ կկատարվեն
Վրաստանի խորհրդարանը փոփոխություններ է նախատեսում Վրաստանի այն քաղաքացիների համար, որոնց անձը հաստատող փաստաթղթերում և անձնագրերում նշված ծննդյան ամսաթիվը տարբերվում է իրենց իսկ ծննդյան ակտերում և ծննդյան վկայականներում (ծննդականում) նշված ծննդյան ամսաթվից։ Այս մասին գրում է aliq.ge-ն։
Այս ուղղությամբ փոփոխություններ են կատարվում «Վրաստանում բնակվող Վրաստանի քաղաքացիներին և օտարերկրացիներին տրամադրելու կարգի, Վրաստանի քաղաքացու ինքնության (բնակության) վկայականի և անձնագրի գրանցման մասին» օրենքում, որը խորհրդարանը կքննարկի և կընդունի արագացված կարգով։
Օրենքում նախատեսվում է լրացնել հետևյալ նորմը. եթե մինչև 2024 թվականի մայիսի 1-ը տրված անձը հաստատող փաստաթղթում նշված ծննդյան ամսաթիվը տարբերվում է ծննդյան ակտի կամ դրա տիրոջ ծննդյան վկայականում նշված ծննդյան ամսաթվից, 2024 թվականի մայիսի 1-ից հետո այդ անձին տրված Վրաստանի քաղաքացու անձը հաստատող յուրաքանչյուր նոր փաստաթղթի և Վրաստանի քաղաքացու յուրաքանչյուր նոր անձնագրի մեջ, ապա, նրա համաձայնությամբ, մուտքագրվելու է նույն ծննդյան ամսաթիվը, որը նշված է մինչև 2024 թվականի մայիսի 1-ը տրված անձը հաստատող փաստաթղթում։
Նախագծում նաև նշվում է, որ Վրաստանի քաղաքացու վերը նշված անձը հաստատող նոր փաստաթղթի կամ Վրաստանի քաղաքացու նոր անձնագրի մեջ ծննդյան ամսաթվի մուտքագրումը չի կարող հիմք հանդիսանալ քաղաքացու անձը հաստատող փաստաթուղթը/անձնագիրը չեղարկելու համար։
Նախաձեռնողների խոսքով, մեր օրերում Վրաստանի քաղաքացիների որոշ մասը երկար տարիներ ունի Վրաստանի քաղաքացու անձը հաստատող փաստաթուղթ կամ Վրաստանի քաղաքացու այնպիսի անձնագիր, որում նշված ծննդյան ամսաթիվը տարբերվում է սեփականատիրոջ ծննդյան ակտում կամ ծննդականում գրանցված ծննդյան օրից, ինչը հիմք է հանդիսանում այդ անձանց անձը հաստատող փաստաթղթերը չեղյալ հայտարարելու և նրանց անձնագրերի վավերականությունը կասկածի տակ դնելու համար:
Նախագիծը պատրաստել են իշխող «Վրացական երազանք» կուսակցության պատգամավորները, փոխանցում է interpressnews լրատվականը:
