Սոթքի հանքավայրի աշխատանքի դադարեցումը բացասաբար է ազդել ՀՀ տնտեսության վրա. նախարար

Սոթքի ոսկու հանքավայրի աշխատանքի դադարեցումը 2023թ. բացասաբար է ազդել ՀՀ տնտեսության աճի ցուցանիշների վրա։ ԱԺ-ի մշտական հանձնաժողովների համատեղ նիստում այս հայտարարությունն արեց ՀՀ ֆինանսների նախարար Վահե Հովհաննիսյանը` ամփոփելով 2023թ. հիմնական տնտեսական ցուցանիշները։

Մայիսին տեղեկացրել էինք, որ պարբերական հրետակոծությունների պատճառով Սոթքի բաց հանքի աշխատանքը դադարեցվել է։ Հոկտեմբերին Գեղարքունիքի մարզպետ Կարեն Սարգսյանը հայտարարեց, որ հանքավայրը մասամբ շարունակում է աշխատել, խոսքը փակ հատվածի մասին է

Հովհաննիսյանի խոսքով` արդյունաբերությունը բացասաբար է ազդել տնտեսական ակտիվության ցուցանիշի վրա, և այստեղ մեծ ազդեցություն է ունեցել հատկապես Սոթի հանքի փակումը։

Իսկ հիմնական տնտեսական աճն ապահովվել է ծառայությունների աճով։ Արդյունքում 2023թ. հունվար-սեպտեմբերին տնտեսական ակտիվությունը կազմել է 9.7 տոկոս, թեև օգոստոսին գրանցված բարձր աճը սեպտեմբերին դանդաղել է նաև ծառայությունների ոլորտում։

ՀՀ-ից արտահանումը 2023թ. աճել է 48 տոկոսով, ինչը, ըստ նրա, պայմանավորված է հիմնականում դեպի ՌԴ վերաարտահանման ծավալների 3-ակի աճով, մինչդեռ հայկական արտադրության ապրանքները արտահանման մեջ նվազել են 0.8 տոկոսով։

Հայաստան այցելած զբոսաշրջիկների թիվն աճել է 48.8 տոկոսով։ ՌԴ-ից ՀՀ այցելուների թիվն ավելացել է 64.3 տոկոսով։

«Հունվար-սեպտեմբերին զբոսաշրջիկների թիվը հասել է 1 մլն 850 հազարի. ՌԴ-ից` 945 հազար, այլ երկրներից` 905 հազար»,- ասաց Հովհաննիսյանը։

Աշխատավարձերը 2023թ. առաջին կեսին աճել են 17.4 տոկոսով, աշխատողների թիվն ավելացել է 5.8 տոկոսով, գործազրկությունը նվազել 16-ով։

2023թ. երկրորդ եռամսյակում գործազրկությունը կազմել է 11.7 տոկոս, ինչը ֆինանսների նախարարի գնահատմամբ,պատմականորեն ամենացածրն է ՀՀ–ի համար։