Բացիր աչքերդ, հայ ժողովուրդ. Վազգեն Առաջին
Lույս է տեսել Վազգեն Առաջինի հոդվածների, քննախոսությունների, հուշերի, խորհրդածումների «Բացիր աչքերդ, հայ ժողովուրդ» ժողովածուն։
Գրքում կաթողիկոսն անդրադառնում է նոր իրականությանը՝ մեր ժամանակներին, որոնք ընթանում են դեպի հասարակական-քաղաքական այլ հավասարակշռություն, որտեղ մարդկությունը փնտրում է անպատերազմ, խաղաղ գոյակցություն։
Վեհափառն այս հարահոսում կարեւորում է հայ ժողովրդի նկարագրի պահպանումը, անհատական ու հավաքական առաքինությունների մշակումը, որովհետեւ պատերազմի դաշտում եւ մյուս ոլորտներում «հաղթանակները նկարագրով են շահվում»:
Հեղինակը, «Խրիմյան Հայրիկը՝ որպես դաստիարակ» հոդվածում քննելով հայ ժողովրդի պատմությունը, հորդորում է գիտակցել, որ այն հեռու անցյալում տեղի ունեցած դեպքերի շարադրանք չէ, այլ մեր ազգային կենսափորձը հարստացնող դասագիրք, որից պետք է սովորել։
Այսօր, երբ մարդկությունը խելահեղորեն նետված է զարհուրելի պատերազմում, երբ մահն ու ավերն արշավում են հորիզոնից հորիզոն, երբ հազարամյա սկզբունքներն ու արժեքներն անդունդն են գլորվում, Վազգեն Առաջինը սթափեցնում է եւ ուղղորդում. «Փրկության լաստը ներսից է գալու»։
Նախագծի ղեկավարն է Ներսես Տեր Վարդանյանը, կազմող և փոխադրողը՝ Արմեն Սարգսյանը, սրբագրիչը՝ Կարինե Մեսրոպյանը, էջադրողը՝ Արփինե Գուլոյանը, շապիկը՝ Լիլիթ Ալթունյանը, հրատարակիչ՝ «Վերնատուն» հրատարակչություն:
Օգոստոսի 8-ից՝ բոլոր գրախանութներում:
