Պահպանեք երթևեկության կանոնները և եղեք չափազանց ուշադիր․ Ոստիկանություն
Հանրապետության գրեթե բոլոր հատվածներում սկսել է ձյուն տեղալ։ Որոշ հատվածներում տեղումներն անձրևի տեսքով են։ Երթևեկության անվտանգության տեսանկյունից սա նշանակում է, որ վարորդները այս եղանակի համար պետք է նախապատրաստեն մեքենան։
Ձմռանը ավելի հաճախ են տեղի ունենում ճանապարհատրանսպորտային պատահարներ: Գլխավոր պատճառներից մեկն էլ, իհարկե, ձյունն է:
Ձմռանը առաջին հերթին անհրաժեշտ է փոխել անվադողերը` անցնելով ձմեռային ռեժիմի: Ըստ մասնագետների՝ անվադողերը պետք է փոխել +7 ջերմաստիճանի դեպքում։ Հաճախ շրջաններ մեկնող մեր քաղաքացիներին խորհուրդ է տրվում մեխերով կամ այլ կերպ ասած՝ «շիպերով» անվադողեր, իսկ ոչ այնքան շատ ճանապարհորդել նախընտրող վարորդներին՝ ձմեռային ֆրիկցիոն անվադողեր:
Ձյան պայմաններում կարևոր է նաև մեքենան տեղից ճիշտ շարժելը: Արգելվում է կտրուկ որևէ գործողություն, այլապես անիվները կպտտվեն ձյան վրա, իսկ մեքենան կմնա տեղում:
Երթևեկության ժամանակ արգելվում են կտրուկ շարժումները: Ամեն ինչ պետք է անել հնարավորինս սահուն, վարել նույնիսկ թույլատրված արագությունից դանդաղ: Կարևոր է նաև դիմացի և ձեր մեքենայի հեռավորությունը: Պահպանեք տարածություն: Արգելակելու դեպքում հետևի մեքենայի վարորդը կտեսնի արգելակման կարմիր լույսերը, ինչը նրան կստիպի նույնպես արգելակել և զերծ մնալ բախումից:
Կտրուկ արգելակել առհասարակ չի կարելի, եթե, իհարկե, վթարային իրավիճակ չէ: Մեքենան ձյան վրա կտրուկ արգելակել՝ նշանակում է պարզապես չարգելակել, որովհետև այն հազիվ թե կանգնի մոտ տարածության վրա. Պետք է արգելակել շատ սահուն, մի քանի անգամ ոտքով հարվածել արգելակման ոտնակին: Այս դեպքում և՛ չենք կորցնի կառավարումը, և՛ ավելի կարճ տարածության վրա կկարողանանք կանգնեցնել մեքենան:
Ձյան վրա տարբեր հնարքների սիրահարներին կոչ ենք անում զերծ մնալ ցանկացած վայրում ձյան վրա պտույտներ կամ այլ հնարքներ կատարելուց: Դա ոչ միայն կասկածի տակ կդնի մեքենայի սարքինությունը, այլև կարող է ավարտվել ողբերգությամբ:
Հարգելի՛ վարորդներ, մեքենան վարեք սթափ, մի՛ գերազանցեք սահմանված արագությունը, պահպանեք երթևեկության կանոնները և եղեք չափազանց ուշադիր: Արդեն ձմեռ է…
