Կոչ ենք անում Առողջապահության նախարարի խոսնակին հարգել լրատվականների գործունեությունը. «Մեդիա պաշտպան»
«Մեդիա պաշտպան» նախաձեռնությունը ֆեյսբուքյան իր էջում հանդես է եկել կոչով՝ ուղղված ՀՀ առողջապահության նախարարի խոսնակին:
««Հետք» լրատվականը հոդված է հրապարակել, որում նկարագրված է COVID-19֊ով վարակված ամուսինների պատմությունը։ Ըստ հրապարակված հոդվածի` կորոնավիրուսով հիվանդացած Արման Բաբաջանյանը 10 օր հոսպիտալացված է եղել, սակայն բուժումը կիսատ թողնելով, նրան տուն են ուղարկել։
Առողջապահության նախարարության մամուլի խոսնակ Ալինա Նիկողոսյանն, անդրադառնալով հոդվածին, չի հերքել լրատվականի հրապարակած հարցազրույցում տեղ գտած փաստերը՝ նշելով․ «Վերջիններս հիվանդանոցից դուրս են գրվել բուժման ընթացքի 10-րդ օրը, մայիսի 24֊ին, քանի որ չեն ունեցել ախտանշաններ»։
ԱՆ մամուլի խոսնակը, փաստացի հաստատելով այս ամենը, հանդիմանում է լրատվամիջոցին, իր խոսքում հավելելով, որ դեմ է, որ պացիենտները բժշկական հարցեր պարունակող տեղակատվություն տարածեն։ Լրատվականն, իր հերթին, գործել է էթիկայի և լրատվության կանոնների համաձայն՝ ունենալով հավաստի տեղեկություն և հարցազրույց տվող կողմի համաձայնություն։
Կոչ ենք անում Ալինա Նիկողոսյանին հարգել լրատվականների գործունեությունը»։
Ինչպես արդեն հայտնել էինք նախօրեին Hetq.am կայքում «Չթեստավորված կամ թեստավորման դրական արդյունքով դուրս գրվածներս ո՞ր վիճակագրության մեջ ենք» վերնագրով հոդված էր հրապարակվել, որում Քաղաքաշինության կոմիտեի նախագահի խորհրդական, Գերագույն խորհրդի և Ազգային ժողովի նախկին պատգամավոր Արամ Բաբաջանյանը ներկայացրել էր կորոնավիրուսով հիվանդանալու, 10 օր հոսպիտալացված լինելու և բուժումը կիսատ թողած տուն տեղափոխվելու մասին: Հոդվածին ի պատասխան՝ արձագանքել էր ՀՀ ԱՆ մամուլի խոսնակ Ալինա Նիկողոսյանը:
