Կառավարությունը 74 միլիոն դրամ հատկացրեց Ռադիոիզոտոպների արտադրության կենտրոն ՓԲԸ-ին
Կառավարությունն այսօր 74 միլիոն դրամ հատկացեց Տարածքային կառավարման և ենթակառուցվածքների նախարարության Պետական գույքի կառավարման կոմիտեին՝ վերջինի ենթակայության տակ գտնվող Ռադիոիզոտոպների արտադրության կենտրոն ՓԲԸ-ին հատկացնելու համար:
Նախագիծը գործադիրի համաձայնությանը ներկայացնող Տարածքային կառավարման և ենթակառուցվածքների նախարար Սուրեն Պապիկյանը հայտնեց, որ ընկերությունը փաստացի գործունեություն չի ծավալել, չի մատուցել ծառայություններ, սակայն կենտրոնի տարածքի, առկա թանկարժեք նյութերի պահպանման, գործարկման, ինչպես նաև մասնագետներին վարձատրության համար անհրաժեշտ է նշված գումարը:
Ինչպես տեղեկացվեց կառավարության նիստի ընթացքում, կենտրոնում արտադրվելու են իզոտոպներ, որոնք օգտագործվելու են քաղցկեղի վաղ հայտնաբերման համար:
Նախարար Արսեն Թորոսյանը նշեց, որ, եթե կորոնավիրուսի համավարակը չլիներ, ապա այս կենտրոնն արդեն կաշխատեր և կընդուներ պացիենտների:
«Առաջ, երբ մենք այս կենտրոնը չունեինք, մեր քաղաքացիներն այլ երկրներում էին գնում հետազոտվում, ուստի մեզ համար օրվա խնդիր է պակասող սարքավորումները Երևան հասցնելն ու կենտրոնը գործարկելը: Իսկ եթե որոշում կայացվի, որ պետությունն է ղեկավարելու այս հիմնարկը, ապա մենք պատրաստ ենք ստանձնել այս կենտրոնի տնօրինումը և մենք նաև դիտարկում ենք Ուռուցքաբանության կենտրոնի հետ այն որպես մեկ միավոր դիտարկելու հարցը»,- ասաց նախարար Թորոսյանը:
Փոխվարչապետ Տիգրան Ավինյանն էլ տեղեկացրեց կառավարության անդամներին, որ կենտրոնի հետ կապված կա արբիտրաժային գործ, հիմա ընթանում են բանակցություններ այն կողմի հետ, որը պետք է ստանձնի ղեկավարումը:
Ըստ Ավինյանի՝ պայմանագրային դրույթների խախտում է տեղի ունեցել, խնդիրները լուծելու գործընթացը շարունակվում է:
«Այս կենտրոնը պետք է գործարկվի: Ընդհանուր առմամբ իրավական խնդիրները վերջնական հանգուցալուծելուց հետո կունենանք երկու լուծման տարբերակ, որոնց մասին այս փուլում չէին ցանկանա բարձրաձայնել»,- ասաց Ավինյանը:
