Կիպրոսի իշխանությունները Թուրքիայի հորատման նավի աշխատակիցների ձերբակալման կարգադրագիր են տվել. Demiroren
Կիպրոսի Հանրապետության իշխանությունները «Ֆաթիհ» թուրքական հորատիչ նավի անձնակազմի անդամների ձերբակալման կարգադրագիր են տվել, նավ, որը գտնվում է Կիպրոսի մերձակայքում՝ առափնա ծանծաղուտում հորատում կատարելու համար: Այդ մասին, հայտնել է Demiroren թուրքական գործակալությունը:
Գործակալության տեղեկատվության համաձայն, կարգադրագիրը միջազգային ուժ ունի: Ընդամենը ձերբակալման սպառնալիքի տակ է 25 մարդ, այդ թվում՝ Թուրքիայի պետական նավթընկերության հետ կապված ֆիրմաների աշխատողներ:
«Հյուսիսային Կիպրոսի թուրքական հանրապետության» «կառավարության» ղեկավար Էրսին Թաթարը դատապարտել Է Նիկոսիայի այդ քայլը՝ այն համարելով անօրինական: Նա կոչ Է արել կղզու հարավային մասի իշխանություններին՝ երկխոսություն սկսել եւ առկա բոլոր հարցերը լուծել դիվանագիտական ճանապարհով:
Անցած շաբաթ Թուրքիայի նախագահ Ռեջեփ Թայիփ Էրդողանը հայտարարել էր առափնյա ծանծաղուտի հանքավայրերի նկատմամբ կիպրաթուրքերի իրավունքները պաշտպանելու իր երկրի պատրաստակամության մասին, այդ թվում՝ զինուժերի միջոցով:
Կիպրոսի առափնյա ծանծաղուտում եւ բացառիկ տնտեսական գոտում հայտնաբերվել են բնական գազի խոշոր հանքավայրեր: 2011 թվականին ամերիկյան Noble Energy ընկերությունը հայտնաբերել է, մասնավորապես, «Աֆրոդիտե» հանքավայրը, որի պաշարները գնահատվում են մոտավորապես 140 մլրդ խորանարդ մետր:
Անկարան, որը վիճարկում է Կիպրոսի բացառիկ տնտեսական գոտու սահմանները, այդ շրջան է ուղարկել «Ֆաթիհ» հորատիչ նավը: Թուրքիան հայտարարում է, որ հորատումը կշարունակվի չորս ամիս՝ մինչեւ սեպտեմբերի 3-ը, հաղորդել է ՏԱՍՍ-ը:
