Քաղաքացու տան խուզարկությամբ հայտնաբերվել է ապօրինի պահվող զենք և զինամթերք
ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում՝ ՀՀ քրեական օրենսգրքի 235-րդ հոդվածի 1-ին մասով (ապօրինի կերպով զենք, ռազմամթերք ձեռք բերելը, իրացնելը, պահելը, փոխադրելը կամ կրելը) քննվող քրեական գործի շրջանակներում 2019թ. ապրիլի 6-ին, դատարանի որոշմամբ, խուզարկություն է կատարվել Երևան քաղաքի Խորենացու փողոցի տներից մեկում և դրա օժանդակ շինություններում:
Նախքան խուզարկություն կատարելը, նույն տան բնակիչներին՝ ծնված 1953 և 1980թթ., առաջարկվել է ներկայացնել տանը ապօրինի պահվող զենքերն ու զինամթերքը, որի արդյունքում 38-ամյա տղամարդը ներկայացրել է ապօրինի պահվող ատրճանակ և փամփշտատուփ՝ լիցքավորված 9 փամփուշտներով՝ նշելով, որ տանը այլ զենք և զինամթերք չկա:
Կատարված խուզարկությամբ նշված տանը հայտնաբերվել է նաև «Derringer» գրառմամբ փոքր չափերի ապօրինի պահվող ատրճանակ, ինչպես նաև՝ 1 հատ արծաթագույն կռփազենք:
Նշված զենքերն ու զինամթերքը առգրավվել են:
Նախաքննությունը շարունակվում է:
