Բժշկական համալսարանը հյուրընկալել է գետն ընկած ավտոմեքենայի ուղևորներին առաջին օգնություն ցուցաբերած վանաձորցի աշախերտներին
Երևանի Մխիթար Հերացու անվան պետական բժշկական համալսարանի ռեկտոր Արմեն Մուրադյանի և բուհի հոգաբարձուների խորհրդի նախագահ Վահան Արծրունու հրավերով վանաձորցի աշակերտներ, Տանձուտ գետն ընկած ավտոմեքենայի ուղևորներին առաջին օգնությունը ցուցաբերած Էդիկ Ղարաքեշիշյանը , Էդմոն Քոչարյանը Տիգրան Մարկոսյանը իրենց դպրոցի տնօրենի ուղեկցությամբ հյուրընկալվել են բժշկական համալսարանում: Այս մասին տեղեկացրին ԵՊԲՀ լրատվական ծառայությունից։
Հաղորդագրության մեջ նշված է. «Ապագա բժիշկներ կրթող հաստատությունում, լսելով տղաների խիզախ արարքի մասին, ցանկություն էին հայտնել ծանոթանալ նրանց, եւ փոքրիկ նվերներ հանձնել: Արմեն Մուրադյանը, բժշկական համալսարանի ուսանողի հետ, պատանի փրկարարներին նվիրեցին բժշկական խալաթներ և անվանական ժամացույցներ:
Տղաները հայտնեցին, որ դեպքից հետո որոշել են բժիշկ դառնալ: 
«Տղաներին, այսօր ողջագուրելուց բացի, նաեւ պետք է ներշնչել, որ ուրիշի խնդրին, ցավին անտարբեր չլինելն ու վճռական լինելը կարեւորագույն քաղաքացիական պարտք է: Վճռական դրսեւորել այն գիտելիքները, որոնք ստացել են: Տղաներն այսօր ստացան իրենց առաջին խալաթները: Ուրախ եմ, որ ինձ բախտ վիճակվեց այս երեխաներին տեսնել, միգուցե տասնյակ տարիներ հետո նորից հանդիպենք եւ այսօրվա այս խորհրդավոր հանդիպումը իրենց համար եւս լինի հիշարժան»,- ասաց ԵՊԲՀ ռեկտորը:
Արմեն Մուրադյանը տղաներին կոչ արեց, որ եթե իսկապես ուզում են բժիշկ դառնալ, ապա պետք չէ սպասել որեւիցե փորձանքի, որ դրսեւորեն իրենց մարդասիրական մղումները. «Ես 15 տարեկանից եղել եմ հիվանդանոցներում, այնպես որ, իրենք էլ կարող են մտածել այդ ուղղությամբ եւ սկսել մեր ազգաբնակչությանն օգտակար լինել»: 
Հիշեցնենք, որ վթարը տեղի է ունեցել մարտի 3-ին: Տանձուտ գետն ընկած մեքենայի վիրավորներին առաջին օգնություն են ցուցաբերել 3 դպրոցականները: Աշակերտները, գտնվելով վթարի վայրում, կարողացել են արագ կողմնորոշվել, անմիջապես կանչել են փրկարարներին և շտապօգնություն և զուգահեռաբար առաջին օգնություն են ցուցաբերել տուժածներին: Նշենք նաև, որ Էդիկը և Էդմոնը դպրոցի փրկարարական ջոկատի անդամներ են»:
