Հայկական ստարտափը բույսերի հիվանդությունների վաղ հայտնաբերման ԱԹՍ է մշակել
Անօդաչու թռչող սարքերի միջոցով ջերմոցների մոնիտորինգի համակարգը կօգնի հայտնաբերել երիտասարդ տնկիների հիվանդությունները և ժամանակին սկսել դրանց բուժումը։ Դա թույլ կտա նշանակալիորեն կրճատել բույսերի ոչնչացումը, որը ջերմոցային բիզնեսում միջինում հասնում է 10%-ի։ Sputnik Արմենիայի հետ զրույցում այս մասին ասել է «Cropart» ստարտափի համահիմնադիր Սերյոժա Կարապետյանը։
Ըստ նախագծի՝ ջերմոցում «ապրելու» է կոմպակտ անօդաչու սարք, որը սահմանված երթուղով պարբերաբար թռչելու է բույսերի վրայով, անելու է բարձր որակի լուսանկարներ և, օրինակ, օրը մեկ անգամ ուղարկելու է սերվեր։ Այնտեղ պատկերները սկզբում կվերլուծի ԱԲ-ն, այնուհետև դրանք կուսումնասիրեն մասնագետները։ Դրոնը կառավարելու կարիք չի լինի, այն թռիչքներն իրականացնելու է լիովին ինքնավար։
«Ավելի դժվար է զննել այն բույսերը, որոնք արդեն մեծացել են և պատվել տերևներով։ Ուստի ամբողջ իմաստը հիվանդություններն աճի վաղ փուլերում արձանագրելն է։ Պայմանական մեկ միլիոն տնկիներից սա կօգնի կանխել 100 հազարի ոչնչացումը»,- նշել է Կարապետյանը։
Ամենայն հավանականությամբ, նրա խոսքով, անօդաչուն չի կարողանա աշխատել կապված մշակաբույսերի հետ, օրինակ՝ լոլիկի, քանի որ շարքերի արանքով թռչելն անհամեմատ ավելի բարդ կլինի։ Իսկ ահա ելակի, ծաղիկների և այլ մշակաբույսերի դեպքում, որոնք կապելու կարիք չկա, համակարգը լիովին գլուխ կհանի։
Կարապետյանը թիմակիցների հետ արդեն հավաքել է ԱԹՍ-ն և մի քանի անգամ փորձարկել ջերմոցային տնտեսություններում՝ կիսաինքնավար ռեժիմով. սարքը լուսանկարներն ուղարկել է սերվերին, բայց կառավարվել է ձեռքով։ Հիմա մշակողները ցանկանում են ֆինանսավորում ներգրավել՝ լիովին ինքնավար համակարգ ստեղծելու համար։ Թիմն ակնկալում է անհրաժեշտ գումարը հավաքել առաջիկա վեց ամիսների ընթացքում։
Հայաստանի մի քանի ջերմոցային տնտեսություններ արդեն պատրաստ են իրենց հարթակները տրամադրել նոր տեխնոլոգիան փորձարկելու համար, իսկ հետագայում հնարավոր է` դառնան առաջին պատվիրատուները։
«Cropart» նախագիծը ներկայացվել էր «Seaside Startup Summit» բարձր տեխնոլոգիաների համաժողովում, որն օրերս անցկացվեց Սևանա լճի ափին։
