Բրիտանիայի ֆինանսների նախարարությունը սուպերմարկետներին առաջարկում է գների սառեցում՝ կարգավորումների մեղմացման դիմաց
Մեծ Բրիտանիայի ֆինանսների նախարարությունը ճնշում է գործադրում խոշոր սուպերմարկետների ցանցերի վրա՝ առաջարկելով նրանց կամավոր գնային սահմանափակումներ մտցնել հիմնական ապրանքների, մասնավորապես՝ ձվի, հացի և կաթի համար՝ կարգավորող պահանջների մի մասի թուլացման դիմաց։ Դրա մասին Reuters-ին հայտնել են իրավիճակին ծանոթ երկու աղբյուրներ։
Հաստատելով Financial Times-ի հաղորդագրությունն այն մասին, որ նախարարությունն առաջարկել է մեղմացնել փաթեթավորման վերաբերյալ որոշ նոր կանոններ և, հնարավոր է, հետաձգել առողջ սննդին առնչվող նորմերի փոփոխությունները՝ գների սահմանափակման դիմաց, աղբյուրները հայտնել են, որ մանրածախ վաճառողները արձագանքել են վրդովմունքով և դիմադրություն են ցույց տալիս։
Առաջարկները հնչել են կյանքի թանկացման շարունակվող ճգնաժամը հաղթահարելու վարչապետ Քիր Սթարմերի կառավարության փորձերի ֆոնին և հաջորդում են Շոտլանդիայի խորհրդարանում կառավարող Շոտլանդական ազգային կուսակցության համանման նախաձեռնությանը։
«Եթե դա տեղի ունենա, ոչ ոք ներդրում չի անի Մեծ Բրիտանիայում»,- ասել է աղբյուրներից մեկը։
«Եթե ցանկանում եք նվազեցնել սննդամթերքի գների գնաճը, պետք է սկսել բիզնեսի կարգավորման արժեքի վերլուծությունից»,- հավելել է նա՝ մատնանշելով գործատուների հարկերի բարձրացման, նվազագույն աշխատավարձի բարձրացման, փաթեթավորման համար նոր վճարների ներդրման և հազարավոր պարենամթերքների բաղադրության փոփոխության վերաբերյալ կառավարության ձեռնարկած միջոցները։
Մեծ Բրիտանիայում պարենային տարեկան գնաճը մինչև ապրիլի 19-ը՝ չորս շաբաթվա ընթացքում կազմել է 3,8%՝ ըստ Worldpanel by Numerator հետազոտական ընկերության տվյալների։
Անգլիայի բանկը հայտարարել է, որ իր հարցված ընկերություններն այս տարվա ընթացքում ավելի ուշ ակնկալում են պարենային գնաճի աճ մինչև 6–7%, ինչը կապված է Իրանում պատերազմի տնտեսական հետևանքների հետ։
Բրիտանական մանրածախ առևտրի կոնսորցիումը (BRC), որը ներկայացնում է սուպերմարկետների խոշոր ցանցերը, դրանց թվում՝ Tesco-ն և Sainsbury’s-ը, հանդես է եկել գնային սահմանափակումների դեմ։
«1970-ականների ոճով գնային վերահսկողություն մտցնելու և մանրածախ վաճառողներին ապրանքները վնասով վաճառելուն ստիպելու փոխարեն, կառավարությունը պետք է կենտրոնանա պետական քաղաքականության ծախսերի կրճատման վրա, որոնք էլ հենց բարձրացնում են մթերքների գները»,- հայտարարել է BRC-ի գլխավոր տնօրեն Հելեն Դիքինսոնը։
