ՌԴ և Կիպրոսի քաղաքացիությունից հրաժարվելու եմ. գործընթացը սկսվել է. Սամվել Կարապետյան
Այսօր Հակակոռուպցինոն դատարանում մեկնարկեց «Ուժեղ Հայաստան» կուսակցության նախագահ Սամվել Կարապետյանի գործով դատական նիստը: Նիստը նախագահող դատավորը Վահե Դոլմազյանն է:
Դատական նիստի սկզբում Կարապետյանի փաստաբանական թիմը միջնորդություն ներկայացրեց դատական նիստը առանց տեսանկարահանման ու ուղիղ հեռարձակման անցկացնելու մասին: Դատարանը բավարարեց միջնորդությունը:
«Ունեմ ՌԴ և Կիպրոսի անձնագրեր, որոնց վերաբերյալ գործընթաց է սկսվել: Ես ՀՀ քաղաքացի եմ: Քանի որ հիմա «Ուժեղ Հայաստան» կուսակցության նախագահն եմ ու մասնակցելու ենք ընտրություններին և վստահ ենք՝ հաղթելու ենք, այդ անձնագրերից հրաժարվելու եմ:
Այո՛, ՌԴ և Կիպրոսի քաղաքացիությունից հրաժարվելու եմ: Կրթությունս բարձրագույն է, ունեմ տնտեսագիտության դոկտորի կոչում: Նախկինում դատապարտված չեմ եղել:
Այո՛, աշխատում եմ, աշխատում եմ որպես «Ուժեղ Հայաստան» կուսակցության նախագահ, մինչև կալանքս այլ աշխատանք ունեի, Երևանում եմ բնակվում, հաշվառված եմ Տաշիր քաղաքում: Մեղադրական եզրակացությունը չեմ ստացել»,-ասաց Սամվել Կարապետյանը:
Դիմելով դատավոր Դոլմազյանին՝ Սամվել Կարապետյանն ասաց՝ Արշակ Վարդանյանն իր հետ բերել էր թղթի կույտ, բայց ինքը դա մեղադրական եզրակացություն չի համարում:
«Մեղադրողները, նրանց հրաման տվողներն այդ թղթի կույտի հետ ավելի շատ կապ ունեն, քան ես: Ասացի՝ Արշակ Վարդանյանից եմ ստացել, մեղադրողներից չեմ ստացել, եթե սա համարում եք, որ ստացել եմ, ուրեմն ստացել եմ»,- ասաց Սամվել Կարապետյանը:
