Արդյո՞ք Ադրբեջանի նախագահը հետ է կանգնել իր այդ պահանջից, «արտապատվիրակման» խնդիրը հանվե՞լ է օրակարգից, չի՞ լինելու նման վարձակալում կամ արտապատվիրակում. հարցեր ՀՀ կառավարությանը
Քաղաքագիտության դոկտոր, ԱՄՆ Լիհայի համալսարանի պրոֆեսոր Արման Գրիգորյանն իր ֆեյսբուքյան էջում գրում է. «Մի քանի հարց ՀՀ կառավարությանը հրապարակված փաստաթղթի կապակցությամբ.
1. Փաստաթղթում ոչինչ չի ասված Նախիջևանի հետ Ադրբեջանին անխափան կապն ապահովող ճանապարհի ռեժիմի մասին։ Ի՞նչ ռեժիմով է աշխատելու այդ ճանապարհը։
Մասնավորապես, այդ ճանապարհով անցնող ադրբեջանցիները հայ մաքսավորի ու սահմանապահի երես տեսնելո՞ւ են, թե՞ ոչ։ Ադրբեջանի նախագահը պնդում էր, որ չպիտի տեսնեն։
Արդյո՞ք Ադրբեջանի նախագահը հետ է կանգնել իր այդ պահանջից, և՝ եթե, այո, որտե՞ղ կարող ենք տեսնել դրա փաստական հիմնավորումը։ Եթե հետ չի կանգնել, ինչպե՞ս է Հայաստանը համատեղելու իր ինքնիշխանության անվերապահ պահպանման սկզբունքն ու Ադրբեջանի նախագահի դիրքորոշումը։
2. Ակնհայտորեն Նախիջևանի հետ Ադրբեջանի անխափան կապն ապահովող ճանապարհը պետք է ունենա որոշակի անվտանգության ռեժիմ։ Համենայնդեպս, դա եղել է անփոփոխ ենթադրություն մինչ հիմա այդ թեմայով եղած բոլոր բանակցություններում ու խոսակցություններում։ Ի՞նչ ռեժիմ է դա լինելու։ Ո՞վ է երաշխավորելու ադրբեջանական տրանսպորտային միջոցների անվտանգությունը։ Հայաստա՞նը։ Ամերիկյի միացյալ նահանգնե՞րը։ Որևէ ամերիկյան ընկերությո՞ւն։ ԵՄ դիտորդնե՞րը։
3. ԱՄՆ-ում երբ կնքվում էին այդ համաձայնագրերը, նաև դրանից առաջ, ամերիկացիք խոսում էին ինչ-որ հայ-ամերիկյան կոնսորցիումի մասին, որը պատասխանատու էր լինելու այդ ճանապարհի շահագործման համար։ Նրանք խոսում էին նաև այդ ճանապարհը 99 տարով վարձակալելու մասին, այդ թվում, որքան հիշում եմ, ԱՄՆ Նախագահի մակարդակով։
Դրա մասին էր նաև «արտապատվիրակման» հետ կապված ամբողջ աղմուկը։ Այդ խնդիրը հանվե՞լ է օրակարգից։ Չի՞ լինելու նման վարձակալում կամ արտապատվիրակում։
Շատ շնորհակալ կլինեմ, եթե իմ ֆեյսբուքյան ընկեր լրագրողները փորձեն կառավարության ներկայացուցիչներից ստանալ այս հարցերի պատասխանները»։
4. Մի հարց էլ ավելացնեմ։ Ինչո՞վ բացատրել այն հանգամանքը, որ չնայած փաստաթղթում որևէ հղում չկա միջանցքին, իր ելույթում միջանցքի մասին խոսեց Թրամփը` օգտագործելով հենց այդ բառը, դրանից հետո էլ մեծ ոգևորությամբ դրա մասին անդադար խոսում է Թուրքիայի ԱԳ նախարարը։ Ինչո՞վ բացատրել այն փաստը, որ այդ հարցում պայմանավորվածության մասին խոսելիս ԱՄՆ նախկին փոխպետքարտուղարը հայտարարություններ արեց այն մասին, որ Հայաստանը խոցելի է դարձել այդ պայմանավորվածությամբ ու դրա փոխարեն ոչինչ չի ստացել։ Ի՞նչ խոցելիությունների մասին էր խոսում Օբրայենը։
