ԿԳՄՍՆ-ն անցել է գործի․ 87 դպրոցների համար հրատապ պատվիրվել են «Լավ սովորիր, որ լավ ապրես» փաշինյանիզմով պաստառները
Դեռ հուլիսի 17-ին՝ կառավարության հերթական նիստում, Նիկոլ Փաշինյանը հանրայնացրեց «Լավ սովորիր, որ լավ ապրես» գրառմամբ պաստառը՝ տեղեկացնելով, որ այն պետք է փակցվի դպրոցներում:
«Մենք նախկինում ասում էինք, որ կրթության ռազմավարությունը մեզ համար կարևոր է, առանցքային է, անկյունաքարային է։ Բայց իմ կարծիքով, մենք այդ ձևակերպումը պետք է փոխենք և վերաձևակերպենք հետևյալ կերպ՝ կրթությունն է մեր ռազմավարությունը։ Բացարձակապես չկա այդպիսի ոլորտ, որին սա չի վերաբերում,- ասել էր նա և հավելել,- Պետք չէ, որ ուղերձը բացատրվի հատուկ դասերով ու դասընթացներով։ Այն պետք է լինի պարզ, հասկանալի և աչքի առաջ»։
Նա հայտնել էր՝ արդեն տրվել է համապատասխան հանձնարարականը ԿԳՄՍ նախարարությանը։
Բնականաբար, ԿԳՄՍՆ-ն համապատասխան հանձնարարականից հետո անցել է գործի․ նախօրեին նախարարությունը հրատապ մեկ անձ ընթացակարգով գնում է կատարել «Սան պրինտ» ՍՊԸ-ից՝ պատվիրակելով «այլ պոլիգրաֆիական արտադրանքի տպագրման ծառայություն («Լավ սովորիր, որ լավ ապրես» կարգախոսը)»։
Այս գնումը նախարարությանն արժեցել է շուրջ 4 միլիոն դրամ (3 մլն 873.000 դրամ): Ըստ տեխնիկական բնութագրի՝ 2000 մմ X 1200 մմ չափով 87 պաստառները կտեղադրվեն մարզային ու մայրաքաղաքային 87 դպրոցներում։
Ի դեպ, ծառայություններ մատուցող ընկերությունը՝ «Սան պրինտ»-ը, որը 2017 թվականից է սկսել իր գործունեությունը, 2019 թվականից ակտիվացել է պետգնումներում․ պետական տարբեր գերատեսչություններ այս ընկերության հետ տասնյակ պայմանագրեր են կնքել հիմնական ոչ մրցակցային՝ մեկ անձ և հրատապ մեկ անձ ընթացակարգերով։
