«Արտակարգ դրության ռեժիմը կարո՞ղ է վերաբերել ՀՀ տարածքով անցնող կապուղիներին». հարցից հետո Փաշինյանը սկսեց երկար-բարակ թվարկել իրավիճակները
Միացյալ Նահանգներում գտնվող Նիկոլ Փաշինյանն այսօր մամուլի ասուլիսում պատասխանել է լրատվամիջոցների կողմից իրեն ուղղված գրավոր հարցերին։ Այդ հարցերից մեկը վերաբերում էր կապուղիների ապաշրջափակմանը, դրա հետ կապված սահմանափակումներին և, թե արդյո՞ք արտակարգ դրության ռեժիմը կարող է տարարածվել ՀՀ տարածքով անցնող կապուղիների վրա։
Ըստ Նիկոլ Փաշինյանի, կարող է այդ հարցին պատասխանել, բայց դրանից հետո նոր հարց կառաջանա։
«Ինքս կարող եմ այդ հարցերին պատասխանել, որից հետո հնչի հարց՝ իսկ անտառային հրդեհի դեպքում ինչպե՞ս է լինելու։ Այդ հարցին պատասխանելուց հետո կարող է հարց հնչել՝ իսկ հորդառատ անձրևի դեպքում ինչպիսի՞ն է լինելու»,- նշեց Նիկոլ Փաշինյանը և այս տրամաբանությամբ երկար պատասխանեց հարցին, հետո բացատրեց՝ այսպես երկար է պատասխանում, մի քիչ գրոտեսկի է վերածում, քանի որ նկատի ունի, որ բոլոր տեսական և գործնական իրավիճակները չի կարող հերթով նկարագրել։
Ըստ նրա, կան համառոտ արձանագրումներ, որոնց մասին արդեն խոսել է՝ ինքնիշխանություն, տարածքային ամբողջականություն, իրավազորություն, սահմանների անխախտելիություն, ուժի կիրառման անթույլատրելիություն, և այդպես շարունակ։
«Մենք չգիտենք, թե պրակտիկայում ինչպիսին կլինեն իրավիճակները, բայց մենք գիտենք, որ ինչ էլ տեղի ունենա, ինչ շրջանակում պետք է տեղավորվի՝ ինքնիշխանության, իրավազորության սահմաններում։ Այսինքն՝ ՀՀ ինքնիշխանությունն է այն բառը, որը տալիս է բոլոր հնարավոր իրավիճակների բոլոր տարբերակների պատասխանները։
Մենք այս պայմանավորվածությունը ձեռք բերելիս պետք է ոչ թե այնպես անենք, որ հնարավորինս քիչ բեռ ու մարդ անցնի, կամ, եթե հնարավոր է՝ չանցնի, այլ հակառակը։ Այս ամբողջ նախագծի իմաստն այն է, որ մեր տարածաշրջանով և մեր երկրով անցնեն հնարավորինս շատ մարդիկ ու բեռներ, տրանսպորտային միջոցներ։ Դրանք հնարավորինս շատ եկամուտներ են պետական բյուջեի համար, հնարավորինս շատ աշխատատեղեր են»,- շեշտեց Նիկոլ Փաշինյանը։
Մանրամասները՝ 168.am-ի տեսանյութում
