Թբիլիսիի օդանավակայանի մաքսային անցակետում օտարերկրյա քաղաքացու մոտ թմրանյութ է հայտնաբերվել
Եկամուտների ծառայության հաղորդմամբ՝ Թբիլիսիի միջազգային օդանավակայանի մաքսային անցակետում օտարերկրյա քաղաքացուն պատկանող հրուշակեղենի փաթեթավորման մեջ հայտնաբերվել են մինչև 2 կգ թմրանյութ և հոգեմետ նյութեր։ Այս մասին գրում է aliq.ge-ն։
Ծառայության տվյալներով՝ մաքսային ծառայողը ուղեբեռի ռենտգենյան զննման ժամանակ հայտնաբերել է կասկածելի պարունակություն, որից հետո համապատասխան լիազորված անձը ուղեբեռը նշել է կարմիր հատուկ պիտակով և անցկացրել լրացուցիչ ֆիզիկական զննում։
«Խախտողը, որը օտարերկրյա քաղաքացի էր, իր ճանապարհորդական պայուսակում գտնվող հրուշակեղենի երկու հերմետիկ փաթեթների մեջ թաքցրել էր մինչև 2 կիլոգրամ թմրամիջոցներ և հոգեմետ նյութեր, այդ թվում՝ մեթադոն, MDMA և կետամին»,- հայտնել է Եկամուտների ծառայությունը։
Ներքին գործերի նախարարության հաղորդմամբ՝ գործը քննվում է Քրեական օրենսգրքի 260-րդ, 261-րդ, 262-րդ և 263-րդ հոդվածներով։ Գործընթացը վարում է Կենտրոնական քրեական ոստիկանության բաժինը։
