«Ի՞նչ է այդ Լաբուբուն, ու ինչո՞ւ է իմ երեխան խենթանում դրա համար»
Ինչո՞ւ է աշխարհը սիրահարվել մորթոտ էլֆին, ու արդյո՞ք դա վտանգավոր է երեխաների համար
Ո՞վ կամ ի՞նչ է Լաբուբուն
Եթե վերջերս ձեր երեխան ձեզ մոտ վազել է մի փոքրիկ մորթոտ խաղալիքով, որի անունը դժվար է արտասանել՝ Լաբուբու, և հայտարարել է, որ «դա իրեն պետք է շա՜տ շուտ», մի անհանգստացեք․ դուք մենակ չեք։ Այս տարօրինակ անունով խաղալիքը դարձել է գլոբալ տենդենց և արդեն միլիոնավոր մարդկանց է «կապել» իրեն։
Լաբուբուն փոքրիկ հրեշիկ է՝ մեծ աչքերով, երկար ականջներով (նման նապաստակի), սուր ատամներով ու «կասկածելի» ժպիտով։ Նա առաջին անգամ հայտնվել է 2015 թվականին, ստեղծվել է հոնկոնգցի նկարիչ Կասին Լունգի կողմից՝ «The Monsters» հեքիաթային պատմության շրջանակում։
Լաբուբուն և նրա նման այլ կերպարներ սկզբում եղել են գրքերի հերոսներ, բայց շուտով վերածվել են խաղալիքների հավաքածուի, որոնք տարածվել են ամենուր՝ Կորեայից մինչև ԱՄՆ, Ռուսաստան և, իհարկե, Հայաստան:
Ինչո՞ւ է երեխան (ու ոչ միայն) խենթանում Լաբուբուի համար
1. Չգիտես՝ ինչ ես ստանալու
Pop Mart ընկերությունն արտադրում է Լաբուբու խաղալիքները՝ «անակնկալ տուփերով» (blind box)։ Այսինքն՝ մինչև բացելը դու չգիտես՝ ինչ կերպար ես ստանալու։ Դա ստեղծում է դոֆամինային ակնկալիք, որը շատ նման է Kinder Surprise-ին, բայց՝ «մեծերի տարբերակով»։
2. Սելեբրիթիների շնորհիվ դարձել է թրենդ
BLACKPINK-ի Լիսան, Ռիհանան, Դուա Լիպան և այլ հայտնի մարդիկ սկսել են հրապարակել Լաբուբուն իրենց Instagram-ում, TikTok-ում, կախել այն իրենց նորաձև պայուսակներից։ Դրանից հետո այն դարձել է մոդայի աքսեսուար։
3. Տեսքը՝ զվարճալի ու մի քիչ տարօրինակ
Լաբուբուն միաժամանակ փափուկ է ու խենթ։ Շատ երեխաների նա թվում է ուժեղ, պաշտպանող կերպար՝ չնայած փոքր չափերին։ Իսկ մեծահասակներին նա հիշեցնում է մանկություն՝ փափուկ խաղալիք, մուլտֆիլմեր, խաղեր, հեքիաթներ։
4. Հավաքելու հաճույք
Լաբուբուն ունի ավելի քան 300 տարբեր մոդել, կան նաև հատուկ թողարկումներ՝ Coca-Cola-ի, տարերային թեմաներով և այլն։ Դա դարձնում է խաղալիքը կոլեկցիոներների երազանքը։
Իսկ արդյո՞ք Լաբուբուն վտանգավոր է
Շատ ծնողներ Լաբուբուն երբեմն անվանում են «սատանայական», «թաքուն ազդեցություն ունեցող», նույնիսկ «սարսափազդու»։ Դա հիմնականում պայմանավորված է նրա արտաքինով՝ մեծ ժպիտ, սուր ատամներ, մի փոքր անսովոր տեսք։
Սակայն հոգեբանական տեսակետից այս խաղալիքը վտանգավոր չէ, եթե ծնողը հետևում է երեխայի արձագանքներին և հույզերին։ Հակառակը՝ եթե երեխան զգում է, որ խաղալիքն իրեն ուժ է տալիս, թեև խաղում է «մի քիչ չար կերպարով», դա կարող է լինել ինքնապաշտպանական վերապրումների ձև։
Կարևոր է հետևել՝
– Արդյո՞ք խաղալիքը վախեցնում է երեխային։
– Արդյո՞ք նա չափազանց կախված է դառնում դրանից։
– Ի՞նչ կերպար է նա ստեղծում իր երևակայության մեջ։
Խաղալիքն ինքնին վատը կամ լավըչէ։ Կարևոր է այն, թե ինչպես է երեխան նրա հետ «շփվում» և ինչ զգացողություններ է ապրում։
Ինչ անել, եթե խաղալիքը ձեզ դուր չի գալիս
Առանց հասկանալու մի պիտակավորեք այն՝ «վտանգավոր» կամ «սատանայական»:
Զրուցեք երեխայի հետ․ ինչո՞ւ է իրեն դուր գալիս, ի՞նչ է զգում խաղալիս։
Տեսեք՝ արդյո՞ք նա վախենում է, թե՞ պարզապես զվարճանում է։
Եթե որոշեք հեռացնել խաղալիքը, արեք դա հարգանքով, առանց մեղադրանքների կամ վախեցնելու։
Նմանատիպ խաղալիքներ, որոնք նույնպես դարձել են թրենդ
Լաբուբուն միակը չէ։ Ահա վերջին տարիների այլ թրենդային կերպարներ՝
Huggy Wuggy- Սարսափ խաղից ծագած կապույտ հրեշիկ
Skibidi Toilet- Մեմ-կերպար՝ զուգարանից դուրս եկող գլուխ
L.O.L. Dolls- անակնկալ տուփերով տիկնիկներ
Tokidoki Unicorno- Գունեղ մուլտ-միաեղջյուրներ
Sonny Angel- Փոքրիկ մերկ տիկնիկ՝ գլխարկներով
Five Nights at Freddy’s- Սարսափ հերոսներ, որոնք դարձել են խաղալիքներ
Լաբուբուն մոդայիկ, վառ, մի փոքր տարօրինակ, բայց ինքնատիպ կերպար է, որը շատ երեխաների ու մեծերի համար դարձել է ինքնարտահայտման և երևակայության միջոց։ Նա ոչ սատանայական է, ոչ վնասակար, եթե երեխայի հետ կառուցվում է առողջ, վստահելի հարաբերություն։
ՍԻՐԱՐՓԻ ԱՂԱԲԱԲՅԱՆ
