«Տիգրան Ուլուբաբյանին կալանավորելու որոշման դեմ Վերաքննիչ բողոք ենք ներկայացրել, նրան վերջին անգամ դատարանում եմ տեսել». Փաստաբան

Հուլիսի 4-ին ամիսներ տևած քննությունից հետո կալանավորվեց արցախցի 29-ամյա Տիգրան Ուլուբաբյանը։ Նրա նկատմամբ հարուցվել է քրեական գործ՝ Քրեական օրենսգրքի 46-252-րդ հոդվածի 3-րդ մասի 2-րդ կետով (ավազակությանն օժանդակելը)։

Ըստ Քննչական կոմիտեի տարածած հաղորդագրության, Քննչական կոմիտեի Լոռու մարզային քննչական վարչությունում նախաձեռնված քրեական վարույթի նախաքննության ընթացքում ձեռնարկված քննչական գործողությունների, ինչպես նաև ՆԳՆ աշխատակիցների կողմից համատեղ իրականացված պլանավորված և հետևողական աշխատանքների արդյունքում ձեռք են բերվել առերևույթ փաստական տվյալներ, որ 2025 թվականի մարտի 14-ին երկու անձ ապօրինի մուտք են գործել Վանաձոր քաղաքի բնակչուհի Ք.Բ.-ի բնակարան, ատրճանակները պահել են վերջինիս և նրա անչափահաս երեխայի ուղղությամբ, ապա ատրճանակի սպառնալիքով պահանջել  են ոսկյա զարդեր և գումար, որից հետո Ք.Բ.-ն ննջասենյակից վերցրել և զարդատուփով նրանց է փոխանցել 7 հատ ոսկյա զարդ:

Նշենք, որ ամիսներ առաջ տեղի ունեցած ավազակային հարձակման միջադեպից հետո, Լոռու մարզային քննչական վարչությունը Տիգրան Ուլուբաբյանին կանչել էր հարցաքննելու, որի ընթացքում, ինչպես հետո Տիգրան Ուլուբաբյանն էր հայտարարել՝ իրեն ծեծել են, նվսատացրել և ստիպել են, որպեսզի խոստովանի, թե ինքն է իրականացրել բարեկամուհու տան վրա այդ հարձակումը։

Կալանքի տակ գտնվող 29-ամյա տղան շարունակում է պնդել՝ ավազագային հարձակման հետ որևէ կապ չունի: Այս մասին նա նամակ էր գրել, որը հրապարակել էր նրա պաշտպաններից մեկը.

«Ցանկանում եմ հանրությանը տեղեկացնել, որ կատարված հանցանքի հետ ես ոչ մի կապ չունեմ և անմեղ եմ։ Քննիչ Արմեն Գևորգյանն ակնհայտորեն փորձում է ինձ մեղադրել՝ լինելով ընկեր այն ոստիկանների, ովքեր ինձ բռնության են ենթարկել։ Գտնվելով անազատության մեջ՝ ես անընդհատ լսում էի, թե ինչպես քննիչը առանց իմ փաստաբանի ներկայության խոսում էր ոստիկանների հետ հեռախոսով՝ նրանց փոխանցելով, որ ես շուտով կալանավորվելու եմ 2 ամսով։ Նա իրեն պահում էր այնպես, կարծես հենց ինքն էր դատավորը։ Բացի այդ, ուղիղ 5 ժամ ինձ զրկել են իմ հարազատների և փաստաբանի հետ կապ հաստատելու հնարավորությունից։

Ես խնդրել եմ իմ նոր պաշտպանին, որ այս գրությունը հրապարակվի ֆեյսբուքյան իր էջում, որպեսզի հանրությունը իմանա՝ ինչ է տեղի ունենում»,- գրել էր նա։

168.am-ի հետ զրույցում փաստաբան Տիգրան Մկոյանն ասաց, թե դատարանը գտել է, որ հիմնավոր կասկած կա, ուստի Տիգրանին կալանավորելու որոշում է տվել։

«Հիմա նախաքննություն է ընթանում, ուրիշ ապացույցներ թող ձեռք բերեն, տեսնենք՝ ինչ է լինելու, կարծում եմ՝ իրենց բերած հիմքերը թույլ են։

Եթե չեմ սխալվում՝ Տիգրանի գործով նոր պաշտպան պետք է ներգրավվի, գուցե այս պահին ներգրավված է։

Տիգրանին կալանավորելու որոշման դեմ Վերաքննիչ դատարան բողոք ենք ներկայացրել, տեսնենք՝ ինչ որոշում կկայացնի դատարանը»,- 168.am-ի զրույցում ասաց Տիգրան Մկոյանը։

Փաստաբանը նշեց՝ Տիգրան Ուլուբաբյանին տեսել է ձերբակալման օրը և դատարանում, քանի որ այս պահին արձակուրդում է, դեռևս չի հասցրել տեսակցել նրան։

Ավելի վաղ Տիգրան Ուլուբաբյանը 168.am-ի հետ զրույցում՝ ոստիկանությունում իրեն ծեծելու միջադեպի վերաբերյալ ասել էր, որ գողին Լոռու ոստիկանները չեն կարողանում հայտնաբերել, իրեն են ստիպում խոստովանել։

«Բաժնի պետն ասում է՝ խոստովանիր, որ դու ես կատարել, այստեղից դուրս կգաս, այնպես կանեմ, որ ոչ մի բանի հետ կապ չես ունենա։ Ասացի՝ խոստովանելու բան չունեմ։ Ուզում էին գործը գլխիս կապեին, որովհետև գողերին չէին կարողանում գտնել։

Ես մինչև վերջ գնալու եմ, որ սրանք իրենց պատիժը ստանան։ Նույնիսկ, եթե մարդ են սպանում, ոստիկանությունում այդպես չեն վարվում հետը, բայց ես ո՛չ մարդ եմ սպանել, ո՛չ էլ այլ հանցանք եմ արել։ 1 տարի է՝ Վանաձորում եմ ապրում, ոչ մեկի հետ խնդիր չեմ ունեցել, ժողովուրդը շատ թե քիչ ինձ ճանաչում է, իմ կյանքով ապրում եմ, անշնորհք բան չեմ արել»,- ասել էր Տիգրան Ուլուբաբյանը։

Նշենք, որ արցախցի 29-ամյա տղան երկկողմանի ծնողազուրկ է, եղբայրն ու հայրն ազատամարտիկ են եղել, զոհվել են և մոր հետ հուղարկավորված են Արցախում՝ Մարտունի քաղաքում։ 2023 թվականի ադրբեջանական ագրեսիայի հետևանքով Տիգրանն էլ հազարավոր արցախահայերի նման բռնի տեղահանվել է իր բնօրրանից։