Հյուսիսային Իռլանդիայում շարունակվում են անկարգությունները
Հյուսիսային Իռլանդիայում արդեն երրորդ օրն է, ինչ շարունակվում են միգրանտների դեմ բողոքի ցույցերը, որոնք վերածվել են անկարգությունների։ Այս մասին հաղորդում է The Times-ը։
Հունիսի 11-ի երեկոյան Հյուսիսային Իռլանդիայի Բալիմենա քաղաքում ցուցարարները կրկին բենզինով, դյուրավառ հեղուկով շշեր ու աղյուսներ են նետել իրավապահ մարմինների աշխատակիցների վրա։ Ոստիկանությունը ցուցարարներին ցրելու նպատակով ջրցան մեքենաներ և պլաստմասե փամփուշտներ է օգտագործել։
Անկարգությունները տարածվել են տարբեր քաղաքներում, այդ թվում՝ հարևան Լառնում։ Այնտեղ ցուցարարները հրկիզել են ժամանցի և հանգստի կենտրոնը, որտեղ ապաստան էին գտել Բալիմենայից իրենց տների ավերման հետևանքով տեղահանված մարդիկ։
Միգրանտների դեմ բողոքի ցույցերը Բալիմենայում սկսվել են հունիսի 9-ի երեկոյան՝ անչափահաս աղջկա ենթադրյալ բռնաբարությունից հետո։ Ցույցերի առաջին օրը վիրավորվել է 15 իրավապահ, 1 անձ ձերբակալվել է։ Անկարգությունների երկրորդ օրը վիրավորվել է 17 ոստիկան։ Նրանցից մի քանիսը հոսպիտալացվել են։ Ձերբակալվել է 6 ցուցարար։
Հունիսի 9-ի երեկոյան մոտ 3000 մարդ դուրս է եկել քաղաքի փողոցներ։ Բռնաբարության ենթադրյալ վայրի մոտ տեղի ունեցած ցույցը վերածվել է ոստիկանության հետ բախումների։
Աղջկա ենթադրյալ բռնաբարությունը տեղի է ունեցել Բալիմենայում հունիսի 7-ի երեկոյան։ Միջադեպից հետո ձերբակալվել են երկու 14-ամյա դեռահասներ։ Հունիսի 9-ին նրանք ներկայացել են քաղաքային դատարան, որտեղ նրանց մեղադրանք է առաջադրվել բռնաբարության փորձի համար, որը երկուսն էլ հերքել են։
