«Չկա «до и после» Նիկոլ, նա նույնն է և երբեք չի փոխվելու». Արմեն Աշոտյան
«5 հարց՝ Արմեն Աշոտյանին» հեռակա զրույցի շրջանակներում ՀՀԿ փոխնախագահ, քաղբանտարկյալ Արմեն Աշոտյանն այս շաբաթ անդրադարձել է Նիկոլ Փաշինյանի ասուլիսի կարևոր թեմաներին:
«Հարգելի հայրենակից, արդեն ավանդական դարձած այս ձևաչափում այսօր մի փոքր փոփոխություն եմ անում՝ հարցերիդ փոխարեն Փաշինյանի երեկվա ասուլիսում հնչած հինգ թեմաներին անդրադառնալով։ Հուսով եմ, մի փոքր օգտակար կլինեմ քո պայքարում։ Հայցում եմ ըմբռնումդ և սպասում հաջորդ շաբաթվա քո հարցերին»,- նշել է նա։
Թեմա 5
«Չկա «до и после» Նիկոլ, նա նույնն է և երբեք չի փոխվելու»:
Արմեն Աշոտյանի մեկնաբանությունը:
«Ցանկացած այլ, առավել ևս՝ ժողովրդավարական երկրում քաղաքական գործիչների և պաշտոնյաների նախկին խոստումների կամ գնահատականների և իրականության մեջ խզումը մեծ ռեզոնանս և հետևանքներ է ունենում։ Նիկոլի պարագայում այս ոլորտը լրատվական-քաղաքական Կլոնդայկ է, քանզի գրեթե չկա մեկ խոստում, մեկ կարծիք, մեկ գնահատական, որ նա չի դրժել, չի փոխել, հակառակը չի արել։
«До и после» Նիկոլների միջև արմատական խզումը բացահայտել և ի ցույց դնելը վերածվել է հայկական ազգային զբաղմունքի։ Կարելի է նույնիսկ մտածել այդ սյուժեով համակարգչային խաղ ստեղծելու մասին։
Վերջին ասուլիսը բացառություն չէր, երբ նրան դեմ տվեցին իր նախկին հայտարարություններից մի քանիսը։ Նիկոլի արձագանքները նման դեպքերում միատեսակ են. նա կկոցում է աչքերը, քորում է քիթը, անհանգիստ շարժումներ է անում ու, ժամանակ շահելով, մտածում է, թե ինչ կռուտիտ անի։
Կարող է երկար-բարակ բառակույտ արտաբերել, պրիմիտիվագույն մտքեր հայտնել, եթե այլ բան չմտածի, կասի՝ չեմ հիշում, որ նման բան եմ ասել։ Այս ստերի մեջ, սակայն, առանձնանում է 2021թ.-ի նախընտրական խոստումների ու կառավարության հաստատված ծրագրի և իրականության միջև անդունդը։ Նրա հիմնավորումները, թե փորձել ենք իրացնել 2021-ի խոստումները, բայց պատերազմից հետո բան էր փոխվել, կեղծ են և ոչ համոզիչ, քանզի 2020-ի նոյեմբերից հետո մինչև 2021-ի հունիս անցել էր 8 ամիս։
Եթե պատերազմից հետո «բան էր փոխվել», ապա ութ ամիսը լրիվ բավարար էր դա ազնվորեն ասելու համար։
Այսինքն՝ Նիկոլը 2021-ին գիտակցված և ծրագրավորված է խաբել ընտրողին, ֆռռացրել 680 000 մարդու։
Այսինքն՝ նա ոչ թե 2018-19-ին «խիզախություն չուներ» մարդկանց ասելու, որ հանձնելու է Արցախը և երկիրը տանի դեպի Անկարա, այլ բարոյականություն չունի՝ երեկ, այսօր և վաղը»։
Մանրամասները՝ տեսանյութում:
