Կա պատերազմի սպառնալիք. Հայաստանը մնացել է մենակ և չունի դաշնակիցներ. Կարեն Իգիթյան
Հունվարի 16-ին Հայաստանի արտաքին գործերի նախարարությունը տարածեց մամուլի հաղորդագրություն այն մասին, որ Հայաստանի և Ադրբեջանի միջև սկսվել են պետական սահմանի սահմանազատման համալիր աշխատանքներն այս անգամ հյուսիսային հատվածից՝ Հայաստանի Հանրապետության, Ադրբեջանի Հանրապետության և Վրաստանի սահմանների հատման կետից և այնուհետև հարավային ուղղությամբ՝ հյուսիսից հարավ մինչև Հայաստանի Հանրապետության և Ադրբեջանի Հանրապետության սահմանը Իրանի Իսլամական Հանրապետության հետ:
Այս հաղորդագրությունից պարզ դարձավ, որ Հայաստանի իշխանությունը հիմա էլ համաձայնել է սահմանագծում և սահմանազատում անցկացնել Տավուշով դեպի Բագրատաշեն տանող հատվածում՝ որտեղով անցնում է հայ-վրացական սահման գնացող մայրուղին և Վրաստանից ՀՀ մտնող գազատարը:
Սահմանագծվելու և սահմանազատվելու է նաև Իջևանից դեպի Բերդ գնացող ճանապարհը, որի մի հատվածը կհայտնվի Ադրբեջանի վերահսկողության տակ:
168 TV-ի «Ռեվյու» հաղորդաշարի եթերում տարածաշրջանային հարցերով փորձագետ Կարեն Իգիթյանը՝ անդրադառնալով ԱԳՆ հաղորդագրությամբ ազդարարվող գործընթացին, նշեց՝ սա հետևանք է Նիկոլ Փաշինյանի կողմից Ադրբեջանը 86.600 քառակուսի կմ-ով ճանաչելու, ինչից էլ օգտվելով՝ Ադրբեջանը Հայաստանից առանց պատերազմի նախ կստանա այն, ինչ հնարավոր է, ապա կանցնի ռազմական գործողությունների։
«Իր այս քաղաքականությամբ ՀՀ իշխանությունը սադրում է, որ Հայաստանի թշնամին ավելի ակտիվանա։ Ի դեպ, ուզում եմ ուշադրություն հրավիրել հատկապես այն հանգամանքի վրա, որ Ալիևը երբ Հայաստանն անվանեց ֆաշիստական պետություն, Ռուսաստանից և ԱՄՆ-ից արձագանք չստացավ։ Հայաստանի ավանդական դաշնակիցը, որը կամաց-կամաց դառնում է ոչ բարեկամ, չպատասխանեց, ինչը հասկանալի է, որովհետև երբ դու քո դաշնակցին համարում ես թշնամի, պարզ է, որ պետք չէ սպասել որևէ արձագանք»,-ասաց Կարեն Իգիթյանը։
Նրա փոխանցմամբ՝Հայաստանի իշխանության վարած քաղաքականությունը բերել է նրան, որ մեր պետությունը հայտնվել է անվտանգության դեֆիցիտ ունեցող երկրի կարգավիճակում։
«Հայաստանը չունի դաշնակից, արտաքին քաղաքականությունը տապալված է, ռեալ մենակ է մնացել, և խնդիրը ՀՀ այս իշխանության մեջ է»,-ասաց Իգիթյանը՝ միևնույն ժամանակ հիշեցնելով՝ Ադրբեջանն այս ամենին զուգահեռ՝ ստեղծում է հիմքեր, դրանք լեգիտիմացնում՝ Հայաստանի դեմ ռազմական գործողությունների անցնելու համար։
«Կա պատերազմի սպառնալիք. տարածաշրջանը լարված վիճակում է. մեծ պատերազմի առաջ է Իրանը, որտեղ անցկացվում են զորավարժություններ . այս պայմաններում առնվազն անհասկանալի են ՀՀ իշխանությունների կողմից հնչեցվող թեզերը, թե ամեն ինչ կարգին է»,-խոսքը եզրափակեց տարածաշրջանային հարցերով փորձագետը։
Հարցազրույցի մանրամասները՝ տեսանյութում։
