Հայիթիում ավազակախումբը սպանել է 110 մարդու՝ նրանց մեղադրելով կախարդության մեջ
Առնվազն 110 մարդ՝ հիմնականում տարեցներ, դաժանաբար սպանվել են ավազակախմբի անդամների կողմից Հայիթիի մայրաքաղաք Պորտ-օ-Պրենսում։ Այս մասին հաղորդում է BBC-ն՝ վկայակոչելով իրավապաշտպան կազմակերպության հայտարարությունը:
Մարդու իրավունքների պաշտպանության ազգային ցանցը հայտնել է, որ տեղական ավազակախմբի ղեկավարը թիրախավորել է մարդկանց այն բանից հետո, երբ նրա որդին հիվանդացել է և մահացել:
Ըստ հրապարակման՝ ավազակախմբի ղեկավարը խորհրդակցել է վուդու հոգևորականի հետ, որը տղայի առեղծվածային հիվանդության համար մեղադրել է տեղացի տարեցներին, որոնք «կախարդություն» են անում:
ՄԱԿ-ը հայտնել է, որ այս տարի Հայիթիում ավազակախմբերի բռնությունների հետևանքով զոհերի թիվը հասել է 5000-ի:
Հայիթիում ավազակախմբերի բռնությունները շարունակվում են 2021 թվականին երկրի նախագահ Ժովենել Մոիզի սպանությունից ի վեր։
