Թբիլիսիի կենտրոնում ցուցարարները «գրավել» են պետական համալսարանի դիմացի փողոցը
Թբիլիսիում հակակառավարական ցույցերի մասնակիցները դուրս են եկել Ռուսթավելիի պողոտայից, որտեղ գտնվում էին երեկվանից: Նրանք գնացել են դեպի Թբիլիսիի պետական համալսարան և դիրքավորվել շենքի դիմացի փողոցում՝ խոչընդոտելով մեքենաների երթևեկությունը, դեպքի վայրից հայտնում են ՌԻԱ «Նովոստի»-ի և ՏԱՍՍ-ի թղթակիցները։
Նախօրեին՝ դեկտեմբերի 2-ին, մի քանի հազար ցուցարարներ կրկին հավաքվել էին Վրաստանի խորհրդարանի շենքի մոտ։ Նրանց ցրելու համար ոստիկանությունը սկսել է օգտագործել արցունքաբեր գազ և ջրցան մեքենաներ։
Անցյալ շաբաթ Վրաստանում բողոքի նոր ալիք է սկսվել՝ կապված իշխանությունների որոշման հետ՝ դադարեցնելու եվրաինտեգրման գործընթացը մինչև 2028 թվականը։
Բողոքի հերթական շարքը Վրաստանում սկսվել է նոյեմբերի 28-ին այն բանից հետո, երբ վարչապետ Իրակլի Կոբախիձեն հայտարարել է ԵՄ-ին Վրաստանի անդամակցության շուրջ բանակցությունները սկսելու հարցը մինչև 2028 թվականը չի ներառվի օրակարգում։ Սա առաջացրել է ընդդիմադիրների զայրույթը: Ցուցարարները քարեր, շշեր, այդ թվում՝ դյուրավառ խառնուրդներ, ճայթրուկներ են նետել խորհրդարանի շենքի վրա։ Ի պատասխան՝ անվտանգության ուժերն օգտագործել են հատուկ տեխնիկա, այդ թվում՝ ջրցան մեքենաներ և արցունքաբեր գազ։ Վրաստանում ավելի քան մեկ ամիս է՝ հոկտեմբերի 26-ին կայացած խորհրդարանական ընտրություններից հետո զանգվածային բողոքի ցույցեր են ընթանում։ Ընտրություններում հաղթել է իշխող «Վրացական երազանք» կուսակցությունը՝ ստանալով ձայների 53,93 տոկոսը։ Խորհրդարան են մտել նաև չորս ընդդիմադիր կուսակցություններ, որոնք հայտարարել են, որ չեն ճանաչելու ընտրությունների արդյունքները և կոչ են արել աջակիցներին դուրս գալ փողոց։ Նախագահ Սալոմե Զուրաբիշվիլին, որն աջակցում է եվրոպամետ ընդդիմությանը, նույնպես կոչ է արել ցույցեր կազմակերպել։
