Լյարդի ցիռոզից մահացության դեպքերը 2030թ. աճելու են. հայ գիտնականները դեղաբույսերի խառնուրդ են ստեղծել
Օրգանական և դեղագործական քիմիայի գիտատեխնոլոգիական կենտրոնի գիտաշխատողները լյարդի ցիռոզի բուժման նոր մոտեցում են առաջարկում, ինչի մասին էլ զրուցել ենք «Դեղաբանության և պաթոհիստոլոգիայի» լաբորատորիայի կրտսեր գիտաշխատող Լիլիթ Արշակյանի հետ։
Նրա փոխանցմամբ` 7 տարի է` ուսումնասիրությունները կատարվում են, արդեն առաջարկվել է նախնական ախտորոշման կապերի վերաբերյալ հիպոթեզ։
«Լյարդի ցիռոզի ուսումնասիրությունները վաղուց են սկսվել, քանի որ լյարդը համարվում է մարդու օրգանիզմի լաբորատորիա։ Լյարդի առողջությունից է կախված մարդու ամբողջ օրգանիզմի առողջական վիճակը, ուստի թեման արդիական է։ Նույնիսկ տվյալներ են հրապարակվել, որ մինչև 2030 թվականը լյարդի հիվանդություններից, մասնավորապես, լյարդի ցիռոզից մահացության դեպքերն աճելու են»,- 168.am-ի հետ զրույցում ասաց Լիլիթ Արշակյանը։
Անդրադառնալով անթառամի և կաթնափուշի խառնուրդին, որը ստեղծվել է իր կողմից` նա նշեց, որ այս համակցումը կարևոր է.
«Բացի այս երկու դեղաբույսը` իմ կողմից կա գրված հիպոթեզ, որ կիրառվեն այլ բույսերի համակցումներ։ Ինչ վերաբերում է անթառամին ու կաթնափուշին, ապա դրանք կիրառվել են անտիկ ժամանակներից` մարդկանց բուժելու նպատակով։ Դա շատ կարևոր էր ինձ համար, որ ճիշտ ուղու վրա եմ և անցյալի փորձը կարող եմ դեպի ապագա տանել»,- ընդգծեց Լիլիթ Արշակյանը։
Անդրադառնալով բնագիտական ոլորտում առկա թափուր հաստիքներին` մեր զրուցակիցն ասաց.
«Մասնագետներ չկան։ Բնագիտական ոլորտում ունենք լավ մասնագետների սով. մոտենում ենք նրան, որ ունենալու ենք այդ խնդիրը»։
