2025թ. ՀՀ-ում հայ-վրացական դաշտային ուսումնավարժանք կանցկացվի՝ ՄԱԿ-ի չափորոշիչներով
2025 թվականին Հայաստանում ՄԱԿ-ի միջազգային որոնողափրկարարական խորհրդատվական խմբի՝ ԻՆՍԱՐԱԳ-ի չափորոշիչներով, Հայաստանը և Վրաստանը համատեղ դաշտային ուսումնավարժանք կանցկացնեն։
Պայմանավորվածությունը ձեռք է բերվել ՆԳՆ ՓԾ տնօրեն, ՆԳ նախարարի տեղակալ Կամո Ցուցուլյանի գլխավորած պատվիրակության Վրաստան պաշտոնական այցի ընթացքում։ Ինչպես հայտնում է ՆԳՆ մամուլի ծառայությունը, Ցուցուլյանը հանդիպումներ է ունեցել Վրաստանի ՆԳՆ արտակարգ իրավիճակների կառավարման ծառայության տնօրեն Թեմուր Մղեբրիշվիլլի և Ճապոնիայի միջազգային համագործակցության (JICA) տարածաշրջանային ղեկավար Վակուի Ջունջիի հետ։
Թեմուր Մղեբրիշվիլլի հետ հանդիպման ժամանակ կողմերը քննարկվել են երկու երկրների համապատասխան ծառայությունների միջև փորձի փոխանակման և համատեղ գործողությունների կազմակերպման հարցեր։
Ընդգծվել է, որ այդ ուսումնավարժանքը կուժեղացնի երկու երկրների համագործակցությունը արտակարգ իրավիճակների արդյունավետ արձագանքման ոլորտում։
Ճապոնիայի միջազգային համագործակցության գործակալության տարածաշրջանային ղեկավար Վակուի Ջունջիի հետ հանդիպման ընթացքում ԷԼ քննարկվել են Հայաստանի
Հանրապետության և Ճապոնիայի միջազգային համագործակցության գործակալության հետ իրականացված ծրագրերը։
Քննարկվել են նաև համագործակցության երեք նոր ուղիներ, մասնավորապես՝ ռադիոկապի արդիականացման, Երևան քաղաքի համար փրկարարական տեխնիկայի ձեռք բերման և խոշոր աղետներին արձագանքելու նպատակով ծանր ինժեներական տեխնիկայի ձեռք բերման վերաբերյալ։
Վակուի Ջունջին հատուկ կարևորել է աղետների ռիսկի նվազեցման միջազգային համագործակցության խորացումը և առաջարկել ընդլայնել համատեղ ծրագրերի շրջանակը՝ ներառելով նաև փորձագետների վերապատրաստման և փոխանակման ծրագրեր։
Պայմանավորվածություն է ձեռք բերվել շարունակելու շփումները նոր ծրագրերի քննարկման վերաբերյալ:
Հիշեցնենք, որ Կամո Ցուցուլյանի գլխավորած պատվիրակությունը պաշտոնական այցով Վրաստանում էր hոկտեմբերի 22-ից 24-ը:
