Այսօր Նյու Յորքում կկայանա Միրզոյան-Բլինքեն-Բայրամով եռակողմ հանդիպումը
Նյու Յորքում ԱՄՆ պետքարտուղար Էնթոնի Բլինքենի այսօրվա հանդիպումը Հայաստանի արտգործնախարար Արարատ Միրզոյանի և Ադրբեջանի արտգործնախարար Ջեյհուն Բայրամովի հետ տեղի կունենա 10։15-ին (Երևանի ժամանակով ժամը 18։15-ին), հաղորդում է ԱՄՆ պետդեպարտամենտը։
Երեկ Հայաստանի արտգործնախարարությունը հաղորդեց, որ սեպտեմբերի 26-ին Նյու Յորքում կկայանա Միրզոյան-Բլինքեն-Բայրամովի եռակողմ հանդիպումը: Բաքուն ևս հաստատեց տեղեկությունը` նշելով, որ հանդիպումը խաղաղության բանակցությունների վերջնական փուլի համար է։
Անցած շաբաթ Վաշինգտոնը հայ-ադրբեջանական բանակցություն կազմակերպելու պատրաստակամություն էր հայտնել։
ԱՄՆ պետդեպարտամենտի խոսնակ Մեթյու Միլլերն ասել էր, որ Վաշինգտոնը միշտ էլ առիթներ է փնտրում Հայաստանի և Ադրբեջանի արտգործնախարարների հանդիպման համար՝ նշելով, որ Բլինքենը հույս ունի ևս մեկ հանդիպում կազմակերպել Նյու Յորքում։
