Իռլանդիայում 403 մլն եվրոյով տուգանել են Google-ին
Իռլանդիայի տվյալների պաշտպանության հանձնաժողովը (DPC) 403 միլիոն եվրոյով տուգանել է Google ընկերությանը՝ օգտատերերի տեղակայման վերաբերյալ տվյալների մշակման կանոնները խախտելու համար: Այս մասին հայտնում է RTE հեռուստաալիքը։
Տվյալների պաշտպանության կանոնակարգի համաձայն՝ գտնվելու մասին տեղեկատվությունը պետք է մշակվի օրինական, արդար և թափանցիկ եղանակով։
Հանձնաժողովից հայտնել են, որ հետաքննության ընթացքում Google-ի կողմից մի շարք խախտումներ են հայտնաբերվել։ Մասնավորապես, օգտատերերը կարող էին տեղյակ չլինել, որ իրենց տեղակայման տվյալներն օգտագործվում են, այդ թվում՝ գովազդ ցուցադրելու կամ իրենց նախասիրությունները որոշելու համար։ Սա կարող էր սահմանափակել անձնական տվյալները վերահսկելու նրանց հնարավորությունը։
DPC-ն հետաքննությունը սկսել էր 2020 թվականի փետրվարին՝ սպառողների իրավունքների պաշտպանությամբ զբաղվող եվրոպական մի շարք կազմակերպություններից բողոքներ ստանալուց հետո, որոնք վերաբերում էին որոշակի ծառայություններում ու ապրանքներում Google-ի կողմից տեղադրության տվյալների մշակմանը։
Արդյունքում տվյալների պաշտպանության հանձնաժողովը նշանակել է ընդհանուր 403 միլիոն եվրոյի չափով տուգանք և Google-ին պարտավորեցրել վեց ամսվա ընթացքում տվյալների մշակման իր համակարգը համապատասխանեցնել սահմանված պահանջներին։
