Բագրատ սրբազանի՝ վարչապետ դառնալու հարցով չեմ ուզում կարծիք հայտնել. մենք կսատարենք այն թեկնածուին, որին կսատարի Սրբազանը. Սերժ Սարգսյան
ՀՀ երրորդ նախագահ Սերժ Սարգսյանն այսօր իր դեմ կեղծ գործով դատական նիստից հետո պատասխանեց լրագրողների հարցերին և անդրադարձավ նաև Տավուշի թեմի առաջնորդ Բագրատ սրբազանի առաջնորդած շարժմանը, ինչպես նաև պատասխանեց հաջողության հնարավորության վերաբերյալ հարցին:
«Հիմա այսպես ենթադրություն անելը լավ գաղափար չէ, բայց կարծում եմ՝ շարժումը լավ թափ է առել, և բոլոր հնարավորությունները ճիշտ օգտագործելու պարագայում այն կհասնի հաջողության»,- նշեց Սերժ Սարգսյանը։
Հարցին՝ ինչո՞ւ են իշխանությունները սուր քննադատում Առաքելական եկեղեցուն ու որոշ սրբազանների, Սերժ Սարգսյանը խորհուրդ տվեց իշխանություններին հարցնել։
«Իմ կարծիքով՝ իշխանությունները ոչ թե քննադատում են, այլ հիմնականում զրպարտում են ընդդիմադիր հայացք ունեցող ցանկացած մարդու, ցանկացած մարդու, ով մտահոգ է իր հայրենիքի ապագայով, ով դեմ է հասարակությունը մասերի բաժանելուն և այլն»,- շեշտեց Երրորդ նախագահը։
Մեկ այլ հարցի, թե իր կարծիքով՝ Բագրատ սրբազա՞նը պետք է լինի վարչապետի թեկնածու, չնայած կա սահմանադրական արգելք, Սերժ Սարգսյանը պատասխանեց.
«Այդ հարցով ես չեմ ուզում կարծիք հայտնել, քանի որ մեր կարծիքը հայտնել ենք մեր Գործադիր մարմնի հայտարարությամբ, նաև մեր կուսակցական ընկերների բազմաթիվ հայտարարություններով, որ մենք սատար ենք այն թեկնածուին, որին կառաջարկի Բագրատ սրբազանը»։
Ինչ վերաբերում է հարցին, թե Բագրատ սրբազանից նախկին նախագահների հետ հանդիպման հրավեր ստացե՞լ է, Երրորդ նախագահ Սերժ Սարգսյանը պատասխանեց՝ հրավեր չի ստացել, սակայն առիթ ունեցել է հանդիպելու Բագրատ սրբազանի հետ։
Թե երբ է հանդիպել, Երրորդ նախագահը հստակ չպատասխանեց՝ ասելով միայն՝ ո՛չ այսօր, ո՛չ երեկ, ո՛չ էլ երեկ չէ առաջին օրը։
Պատասխանելով հարցին, թե արդյոք կիսո՞ւմ է Էդուարդ Շարմազանովի վերջերս հրապարակված գրառման տեսակետը, Սերժ Սարգսյանը հիշեցնելով, որ Շարմազանովն ասել է, որ չի կարող միավորվել տարբեր գաղափարներ կիսող ուժերի հետ, ասաց.
«Մենք որևէ մեկի հետ չենք միավորվել, ամբողջովին սատարում ենք այս շարժմանը»։
Ինչ վերաբերում է խոսակցություններին և քննադատություններին, որ Բագրատ սրբազանի առաջնորդած շարժման հետևում կանգնած են նախկին իշխանությունները, մասնավորապես՝ Երկրորդ և Երրորդ նախագահները, Սերժ Սարգսյանը նկատեց.
«Իրենք ինչ ուզում են, թող ասեն, դրանք ինձ համար ո՛չ Սուրբ գրքից մեջբերումներ են, և ո՛չ էլ շատ մեծ ուշադրության արժանանալու գաղափարներ։
Նախկինների վերադարձից վախենում են, թող գնան խաչակնքվեն, ինչպես ժողովրդական մեթոդներն են, երբ մարդը վախենում է, թող գնան վախերը «չափեն», գնան սառը ջուր խմեն, ինչ ուզում են, թող անեն։ Բայց մենք վերադառնալու որևէ ցանկություն չունենք։ Մենք բազմիցս հայտարարել ենք, որ որևէ ակնկալիք չունենք։ Մեզ ոչ թե իշխանություն է պետք, այլ մենք հետապնդում ենք իշխանափոխության գաղափար»,- ընդգծեց նա։
«Չեմ կարծում, որ մենք նույնիսկ ի վիճակի ենք կրկնօրինակել այդ տեխնոլոգիաները, որովհետև ոչ նախկին, որ այսօրվա շարժումների հետևում ես չեմ տեսնում ուժեր, ովքեր այդպես վարպետորեն տիրապետում են այդ տեխնոլոգիաներին»,- ասաց ՀՀ երրորդ նախագահ Սերժ Սարգսյանը՝ պատասխանելով հարցին, թե հնարավոր համարո՞ւմ է Նիկոլ Փաշինյանի հեռացումը 2018 թվականի հեղափոխության տեխնոլոգիաների կիրառմամբ:
Սերժ Սարգսյանն ընդգծեց՝ ավելի լավ է մտածել, որ Բագրատ սրբազանի առաջնորդած շարժումը կհասնի հաջողության, բայց Աստված ոչ անի, եթե հաջողության չհասնի, ապա մենք միշտ դրան ենք ձգտելու։
Հարցին՝ իշխանափոխության դեպքում հնարավոր կլինի՞ բեկանել Տավուշում սահմանազատման ու սահմանագծման գործընթացը, Սերժ Սարգսյանը պատասխանեց.
«Մենք սահմանազատմանը և սահմանագծմանը դեմ չենք, մենք դեմ ենք այն մեթոդներին, որով այսօր այդ գործընթացն իրականացվում է։ Մենք կողմ ենք, որ սահմանազատումն ու սահմանագծումը տեղի ունենան միջազգային պրակտիկային համահունչ։
Մի՞թե չգիտեք՝ այդ պրակտիկան ինչպիսին է, մեր մամուլում նվազագույնը երեք անգամ եղել է ամբողջը, որ ընդունել է ԵԱՀԿ-ն այդ առնչությամբ։ Կա ՄԱԿ-ի դիրքորոշումը, ես ինչո՞ւ կրկնեմ այդ դիրքորոշումը, իմաստը ո՞րն է»,- շեշտեց Երրորդ նախագահը։
Հարցին՝ ՀՀ իշխանություններն ուղիղ երկխոսության են գնացել Ադրբեջանի հետ, առանց միջնորդների, ի՞նչ է պետք անել, որպեսզի վերահսկողություն գոնե լինի, Սերժ Սարգսյանը պատասխանեց՝ պետք է իրականացնել իշխանափոխություն, ուրիշ կերպ հնարավոր չէ։
Խոսելով Ալմա Աթայի հռչակագրից, Սերժ Սարգսյանն ասաց.
«Ալմա Աթայի սկզբունքը, մեր հասարակության մեջ օրվա խոսույթում նմանեցնում եմ, հիշում եք, Մյունխենյան սկզբունք կար, դրան եմ նմանեցնում, որովհետև նման սկզբունք որևէ տեղ գոյություն չուներ։ Այո, եղել է Ալմա Աթայի հայտարարություն, եղել է արձանագրության ստորագրություն, բայց այնտեղ ի՞նչ սկզբունք կար, տեղյա՞կ եք։ Եթե մոտավորապես տեղյակ եք, ապա ինձ նման հարց չպետք է տաք։
Այնտեղ եղել է ԽՍՀՄ փլուզման մասին հայտարարություն, Խորհրդային Հայաստանի տարածքը որոշվել է 1988 թվականի Խորհրդային Հայաստանի և Խորհրդային Ադրբեջանի կառավարությունների միջև ստորագրված համաձայնագրով։ Վստահաբար այդ քարտեզը կա, բայց չգիտես ինչու՝ ցույց չեն տալիս»,- ընդգծեց Սերժ Սարգսյանը։
Հաջորդ հարցին՝ հնարավո՞ր է հանրությունը Սերժ Սարգսյանին տեսնի Բագրատ սրբազանի կողքին՝ հարթակի վրա, քանի որ սատարում են շարժմանը, ՀՀ երրորդ նախագահը նախ պատասխանեց՝ պարտադիր չէ, քանի որ հարթակներ բարձրանալու սովորություն չունի, բայց եթե դրա անհրաժեշտությունը լինի, կլինի։
«Մենք ամեն ինչի պատրաստ ենք, միայն այս շարժումը հաջողության հասնի ու իշխանափոխություն լինի»,- եզրափակեց Սերժ Սարգսյանը։
Մանրամասները՝ 168.am-ի տեսանյութում:
