Թուրքիայի առաջ ծնկելուց ու գլուխ խոնարհելուց պետք է հրաժարվել. Նազարյան
Հայոց ցեղասպանության 109-րդ տարելիցին ընդառաջ՝ ՀՅԴ Հայաստանի երիտասարդական և «Նիկոլ Աղբալյան» ուսանողական միությունները կազմակերպում են ավանդական «Ջահերով երթը»։
Այս տարի երթը կմեկնարկի Հանարապետության հրապարակից՝ ապրիլի 23-ին, ժամը 19։15-ին՝ «Զա՛րկ, երբ քեզ հալածում են» խորագրով։
168 TV-ի «Ռեվյու» հաղորդաշարի եթերում ՀՅԴ ՀԵՄ Կենտրոնական վարչության ներկայացուցիչ Սևակ Նազարյանը, խոսելով այս երթով Թուրքիային հղվող ազդակների մասին, նշեց՝ սրանով Թուրքիային հերթական անգամ հիշեցնում ենք մեր պահանջատիրության և Հայ դատի մասին։
««Ջահերով երթ»-ն ունի նաև ներքին լսարան, որի նպատակն է՝ ցույց տալ, որ հայ ժողովուրդը, որպես հավաքականություն, հստակ գիտի, որ Թուրքիային պետք է պատասխանատվության ենթարկել։ Ի պատասխան Հայաստանի հանձնվողական իշխանության՝ սրանով մենք ցույց ենք տալիս, որ ուրացման քաղաքականությունը մերժում ենք ու պահանջում տեր կանգնել մեր պահանջատիրությանը»,- ասաց Նազարյանը։
Նրա խոսքով՝ «Ջահերով երթով» Թուրքիային ցույց են տալու նաև հայ ազգի դիմադրության ոգին, որն առավել անհրաժեշտ է դառնում ընդամենը մի քանի ամիս առաջ Արցախում տեղի ունեցած ցեղասպանության ֆոնին։
«Ասում ենք՝ պետք է արժանապատիվ կեցվածք ցույց տալ։ Թուրքիայի դիմաց ծնկելուց ու գլուխ խոնարհելուց պետք է հրաժարվել, որովհետև եթե նրանց պահանջով Հայաստանում ասում են, որ չկա Ցեղասպանության հարց, դրանով նսեմացնում են այդ ոճիրը։ Սա անողները հետո էլ ասելու են՝ իսկ ի՞նչն է խանգարում, որ թուրքերի հետ բարեկամություն անենք։ Լավ, նման բան ասողները կարող է 109 տարի առաջ տեղի ունեցածին չհավատան, բայց չէ՞ որ ընդամենը մի քանի ամիս առաջ Ցեղասպանություն տեղի ունեցավ Արցախում»,- ասաց Նազարյանը՝ ընդգծելով, որ հայ ժողովրդի զգալի մասը՝ ազգային հատվածը, դեմ է այս հանձնվողական օրակարգին։
Նրա խոսքով՝ թեև Հայաստանի ներկայիս իշխանությունն ամեն ինչ անում է, որ առավելապես Երևանից դուրս ապրող մեր հայրենակիցներն ապրեն տեղեկատվական բլոկադայում՝ ստանալով միայն սուտ և իրականությունն աղճատող տեղեկատվություն: Մեր զրուցակիցը միևնույն ժամանակ վստահ է՝ երբ այս իշխանությունը հեռանա, ապա հնարավոր կլինի ունենալ իր հայրենիքի համար կռվող հասարակություն։
Հարցազրույցի մանրամասները՝ տեսանյութում.
