Քանի դեռ տարածքները չեք հանձնել, սպասենք պատերազմի՞. հարց՝ վարչապետին. «Ժողովուրդ»
«Ժողովուրդ» օրաթերթը գրում է․ «Նիկոլ Փաշինյանի՝ Տավուշ վերջին այցը փոթորկել է մարզը:
Քարտեզը գրպանում դրած պտտվող ՀՀ վարչապետը երկուշաբթի օրը Ոսկեպար գյուղի բնակիչների հետ հանդիպմանն ասել էր, որ, հնարավոր է, մինչեւ շաբաթվա վերջ պատերազմ լինի, եթե հայկական կողմը հրաժարվի Ադրբեջանի հետ քննարկել սահմանազատման եւ սահմանագծման հարցերը։
«…Դա նշանակում է՝ շաբաթվա վերջ պատերազմ է սկսվելու։ Հետո ես գիտեմ` ինչ է լինելու պատերազմի վերջում։ Երեւանում, որ մի տեղ իրար տենանք, դուք ասելու եք` մենք գյուղացի ժողովուրդ էինք, այդքան ինֆորմացիա չունեինք, բա դու այդքան տեղեկություն չունեի՞ր, բա դու ի՞նչ էիր անում», – Տավուշում նման հայտարարություն էր արել նա:
Ըստ էության, Նիկոլ Փաշինյանի այս հայտարարությունը ահաբեկչություն էր տավուշցիների նկատմամբ՝ կա’մ զիջումներ, կա’մ նոր պատերազմ:
Նիկոլ Փաշինյանի այս աղմկահարույց հայտարարությունների վերաբերյալ «Ժողովուրդ» օրաթերթը մի քանի ճշգրտող հարց է ուղղել վարչապետի խոսնակին:
Նազելի Բաղդասարյանից նախ հետաքրքրվեցինք՝ տավուշցիներն ինչպես են ընդունել վարչապետի այս հայտարարությունը, արդյոք համաձայնել են նրա այս դիրքորոշման հետ. «Ներկաների արձագանքը հրապարակված նյութում երեւում է»:
Վարչապետի խոսնակից փորձեցինք հետաքրքրվել նաեւ՝ հաշվի առնելով վարչապետի վերոնշյալ հայտարարությունը՝ կարող ենք հետեւություն անել, որ առաջիկա օրերին սահմանային լարվածություն է սպասվում:
Վարչապետի խոսնակը մեր այս հարցին խոստացավ պատասխանել ավելի ուշ, բայց այդպես էլ արձագանք չեղավ»:
