Սերգեյ Լավրովը Իրանի և Թուրքիայի ԱԳ նախարարների հետ քննարկել է Հարավային Կովկասում առկա իրավիճակը
Ռուսաստանի արտաքին գործերի նախարար Սերգեյ Լավրովը հեռախոսազրույց է ունեցել Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանի և Թուրքիայի Հանրապետության արտաքին գործերի նախարար Հաքան Ֆիդանի հետ։ Այս մասին հաղորդագրություն է տարածել ՌԴ ԱԳ նախարարությունը։
Նշվում է, որ Լավրովը Իրանի իր գործընկերոջ հետ քննարկել է 2023 թվականի դեկտեմբերի 7-ին Մոսկվայում կայացած ռուս-իրանական բարձր մակարդակով բանակցությունների ընթացքում ձեռք բերված պայմանավորվածությունների կատարումը, տարածաշրջանային և երկկողմ օրակարգերին առնչվող հարցեր։
Թուրքիայի ԱԳ նախարար Հաքան Ֆիդանի հետ հեռախոսազրույցում Լավրովը մտքեր է փոխանակել երկկողմ և միջազգային օրակարգի արդիական հարցերի շուրջ՝ շեշտը դնելով Հարավային Կովկասում առկա իրավիճակի վրա ՝ հաշվի առնելով տարածաշրջանի երկրների հատուկ դերը Ադրբեջանի և Հայաստանի միջև կարգավորմանը նպաստելու գործում:
Անդրադարձ է կատարվել նաև ռուս-թուրքական համագործակցության առանձին ասպեկտներին, այդ թվում ՝ բարձր մակարդակով առաջիկա շփումների ժամանակացույցին։
