Մեր լավագույն պաշտպանը պետք է լինի քաղաքական պաշտոնյաների գերությունից զերծ ուժեղ պետությունը. Արման Թաթոյան
ՀՀ նախկին ՄԻՊ Արման Թաթոյանը ֆեյսբուքյան իր էջում գրել է․ «Ցավոք, այս տարին «նշանավորվեց» մարդու իրավունքների ծանրագույն խախտումներով. Ադրբեջանը 9 ամսից ավելի շրջափակված պահեց մեր 120,000 հայրենակցի Արցախում, իսկ հետո էլ ենթարկեց զանգվածային ունեզրկման ու Հայրենիքից բռնի տեղահանման, զինված հարձակումներով զրկեց ապրելու իրավունքից, ենթարկեց ֆիզիկական ու հոգեկան անմարդկաին տառապանքների:
Հետո սկսեց ամեն ինչ հերքել ու կեղծել: Այս ամենը տեղի ունեցավ ամբողջ աշխարհի աչքի առաջ:
Չդադարող այս անարդարություններից քաղած գլխավոր դասը պետք է լինի գիտակցումը, որ մեր լավագույն պաշտպանը հենց մեր իսկ պետությունն է, պաշտոնյաների քաղաքական գերությունից զերծ ուժեղ պետությունը:
Պետության ներսում պետք է լինի հարգանք իրար նկատմամբ, համերաշխություն, պատասխանատվություն արարքների հանդեպ ու հավատ սեփական ուժերի նկատմամբ:
Պետք է ապրել նոր նպատակներով ու գաղափարներով, երբեք չսահմանափակվել ձեռքբերածով ու չընկրկել դժվարությունների առաջ` հանուն արժանապատիվ կյանքի և իրավունքի գերկայության երկիր ունենալու համար։
Հենց այսպիսի պետականությամբ և արժեհամակարգով է, որ մարդը կլինի պաշտպանված սեփական երկրում՝ իրավունքի գերակայության հիմնարար երաշխիքներով»:
