Բաքվում ավարտվել է Վագիֆ Խաչատրյանի գործով նախաքննությունը․ APA
Բաքվում ավարտվել է Հակարիի կամրջից հուլիսի վերջին առևանգված Վագիֆ Խաչատրյանի գործով նախաքննությունը։ Այս մասին հաղորդում են ադրբեջանական լրատվամիջոցները՝ տեղեկացնելով, որ այսօրվա նիստին «վկան ցուցմունք է տվել, ապա հրապարակվել են գործում առկա փաստաթղթերը»։
Ըստ APA գործակալության՝ դատախազը դատարանից հավելյալ ժամանակ է խնդրել, նիստը կշարունակվի վաղը՝ նոյեմբերի 7-ին։
Հիշեցնենք, որ Վագիֆ Խաչատրյանն անցնում է «դեկտեմբերի 22-ին Ադրբեջանի դատախազության կողմից հարուցված քրեական գործով՝ Խոջալուի շրջանի Մեշալի գյուղում 1991 թվականի դեկտեմբերի 22-ին հայկական ապօրինի զինված խմբավորումների անդամների կողմից ցեղասպանության, ազգությամբ ադրբեջանցիների տեղահանության, պետությանը պատկանող գույքի ոչնչացման և վնասման փաստերով»։
Խաչատրյանը հերքում է Բաքվի ներկայացրած մեղադրանքները։
