Դատավորն ուղղակի աննախանձելի վիճակում էր. էդ մարդը վախեցած է. Մարգարիտ Եսայան
«Առաջին հայացքից թվում է՝ դատական օրինական պրոցես է ընթանում, բայց իրականում, ցավով, արձանագրվեց, որ ՀՀ-ում դատաիրավական համակարգն արդեն ամբողջովին կրկնօրինակում է Ադրբեջանի դատաիրավական համակարգը,- Արմեն Աշոտյանի գործով դատական նիստից իր ստացած տպավորությունը 168.am-ին փոխանցեց ԱԺ նախկին պատգամավոր Մարգարիտ Եսայանը՝ մանրամասնելով,- Ճիշտ այնպես, ինչպես Ադրբեջանի դատարաններում հայերին են դատում, նույն պրոցեսն իրականացվում է Հայաստանի դատարանում: Այսօր Արմեն Աշոտյանի դատավարությունը Նիկոլի հրահանգը ամեն գնով կատարող դատավորի շտապողականություն էր, և ուղղակի զավեշտ էր, որ Արմեն Աշոտյանը դեռ երկու նախադասություն չարտաբերած՝ դատավորը սարսափահար խնդրում էր, որ ելույթը չքաղաքականացվի»:
Մարգարիտ Եսայանը շեշտեց, սակայն, իրականում ողջ պրոցեսն է քաղաքական, և աբսուրդ համարեց այն, որ դատավորը «վախեցած էր»:
«Դատավորն ուղղակի աննախանձելի վիճակում էր. այդ մարդն ահավոր վախեցած է: Իր մեջ ավելի շատ նիկոլություն կա, քան արդարադատության և օրենքի հանդեպ պատասխանատվություն»,- հավելեց նա:
168.am-ը հետաքրքրվեց՝ արդյո՞ք դատական նիստերի դահլիճում նախկին պատգամավորը տեսել է ԵՄ դեսպանին կամ ԵՄ դեսպանատանից որևէ ներկայացուցչի՝ ինչպես մինչև 2018 թվականին էինք ականատես լինում, Մարգարիտ Եսայանը քմծիծաղով արձագանքեց.
«Նույն այդ ԵՄ բոլոր ներկայացուցիչներն այսօր կարծես ձեռքերը լվացել են ՀՀ արդարադատությունից, և իրենք նույնպես ակնհայտորեն մեծ խաղի մասնակից են, որի հետևանքով ՀՀ-ն պետք է վերանա, որի հետևանքով դատարկեցին Արցախի Հանրապետությունը»:
Մանրամասները՝ տեսանյութում
