Ուկրաինան հայտարարել է, որ ավելի քան 40 նավ օգտվել է Սև ծովի ժամանակավոր միջանցքից

Ավելի քան 20 նավ լքել է ուկրաինական նավահանգիստները հացահատիկի գործարքի ավարտից հետո, և ևս 25-ն այս ընթացքում ժամանել են Օդեսայի շրջան՝ ցորեն բեռնելու համար։ Ինչպես տեղեկացնում է «ТАСС»-ը, այդ մասին հայտարարել է Ուկրաինայի կառավարության ղեկավարի տեղակալ, ենթակառուցվածքների նախարար Ալեքսանդր Կուբրակովը։

Կուբրակովը նաև հայտնել է, որ հացահատիկի գործարքի դադարեցումից հետո Ուկրաինայի նավահանգիստների արտահանման ներուժը նվազել է 40%-ով։ Այս տարվա հուլիսին Ռուսաստանի՝ հացահատիկի գործարքին մասնակցելուց հրաժարվելուց հետո, որն ապահովում էր ուկրաինական հացահատիկի անվտանգ արտահանումը Սև ծովով, Ուկրաինայի ռազմածովային ուժերը հայտարարեցին ժամանակավոր միջանցքների մասին՝ Սև ծովում Չեռնոմորսկի, Օդեսայի և Յուժնիի նավահանգիստներից նավարկվող առևտրային նավերի համար: Միևնույն ժամանակ, Կիևը զգուշացրել է, որ երթուղու վրա պահպանվում է ականների վտանգը։

Հոկտեմբերի սկզբին Ուկրաինայի վարչապետ Դենիս Շմիգալը հայտարարել էր, որ երկիրը սպառում է հավաքված հացահատիկի բերքի միայն 25%-ը, իսկ մնացած 75%-ը ծրագրում է արտահանել, այդ թվում՝ եվրոպական երկրների միջոցով։ Նա նշել է, որ Կիևն ակնկալում է ապահովել արտահանումը ԵՄ-ից համերաշխության ուղիներով, ընդլայնելով Դանուբի նավահանգիստների և նոր հացահատիկային միջանցքների հնարավորությունները։