Շվեդիայում մեկ գիշերվա ընթացքում 4 պայթյուն է որոտացել
Շվեդիայի մայրաքաղաք Ստոկհոլմում, ինչպես նաև Գյոթենբորգ և Նիկյոպինգ քաղաքներում անցած գիշերը մեկ ժամվա ընթացքում 4 պայթյուն է որոտացել։ Այդ մասին հաղորդում է շվեդական The Local պարբերականը։
Գյոթենբորգ քաղաքում գիշերը ժամը 1-ից հետո տասը րոպեի տարբերությամբ երկու պայթյուն է որոտացել երկու տարբեր հասցեներում։
«Երկու վայրերն էլ շղթայվել են, կատարվում են տեխնիկական հետազոտություններ», – հայտնել են ոստիկանությունում՝ հավելելով, որ միջադեպի հետևանքով տուժածներ և նյութական վնասներ չկան։
Գյոթենբորգի ոստիկանությունը հայտնել է, որ դեռ վաղ է ենթադրություններ անել քաղաքում տեղի ունեցած պայթյունի շարժառիթի մասին։
Մեկ ժամ անց մեկական պայթյուն է որոտացել Ստոկհոլմի հարավային արվարձաններից մեկում և մայրաքաղաքից շուրջ 100 կմ հեռավորության վրա գտնվող Նիկյոպինգ քաղաքում։ Երկու վայրերում էլ տուժածներ չկան։
Չորս պայթյուններն էլ որոտացել են բնակելի շենքերում։