Շիրակի մարզում ավելացել են ցորենի ցանքատարածությունները
Շիրակի մարզում ընթացքի մեջ են գարնանային գյուղատնտեսական աշխատանքները: Ինչպես տեղեկացնում է «Արմենպրես»-ը, մարզի ցածրադիր հատվածներում արդեն իրականացվել են հողերի վարման ու մշակման աշխատանքները:
Մարզի գյուղատնտեսության ու բնապահպանության վարչության պետ Ռոման Համայակյանի ասելով թեև դեռ վաղ է գարնանացանի ցանքատարածությունների մասին խոսելը, աշնանացանի մասով արդեն կա ցանքատարածությունների ավելացում: «Ցանքաշրջանառությունով պայմանավորված կան մշակաբույսեր, որոնց մասով ցանքատարածությունների ավելացում կամ նվազում է գրանցվում, բայց ամփոփելով աշնանացան ցորենի տվյալները, նկատում ենք, որ 2022-ի համեմատությամբ մոտ վեց հազար հեկտարով ցանքատարածություններն ավելացել են: Ավելացումը պայմանավորված է աշնանացան ցորենի արտադրության խթանման ուղղությամբ տարվող պետական օժանդակությամբ ծրագրով, որի շրջանակներում ֆերմերային և գյուղացիական տնտեսությունները ծախսերի մասնակի փոխհատուցում են ստանում»,-նշեց Ռոման Համայակյանը՝ տեղեկացնելով, որ կառավարությունը մեկ հեկտարի հաշվով հավաստագրված սերմեր ցանողներին փոխհատուցում է 120 հազար, 70 հազար դրամի չափով էլ ոչ հավաստագրված սերմերով մշակելու պարագայում։ Շիրակի մարզում 5804 շահառու է օգտվել ծրագրից։ Փոխհատուցման գումարն, ըստ նախնական հաշվարկի, կազմում է շուրջ 1 մլրդ 35 մլն դրամ:
Ծրագրի շահառու կարող են հանդիսանալ մինչև 100 հա մակերեսով (բացառությամբ տնամերձ հողատարածքների) ցորենի ցանքատարածություններ մշակող տնտեսվարողները, ընդ որում, միևնույն հողամասի նկատմամբ համասեփականատերերի առկայության դեպքում ծրագրից կարող է օգտվել համասեփականատերերից միայն մեկը։
Նույն տնտեսվարողի կողմից մշակվող ցանքատարածությունների մակերեսների հանրագումարը չի կարող գերազանցել 100 հա–ը։
Արմենուհի Մխոյան
