Բժիշկը բացահայտել է ձկան յուղի օգուտներն ու վնասները
Ձկան յուղի օգտագործումը նպաստում է սրտի և ուղեղի աշխատանքին, բարելավում է հոգեկան վիճակը, պաշտպանում է հոդերը և ոսկորները։ Այնուամենայնիվ, այն ընդունելիս արժե հետևել միջոցին, քանի որ այս նյութի ավելցուկը կարող է հանգեցնել բացասական հետևանքների: Այս մասին, shantnews-ի փոխանցմամբ՝ «Իզվեստիային» ասել է «Մեդիցինա» ԲԲԸ-ի էնդոկրինոլոգ, բժշկական գիտությունների թեկնածու Նատալյա Տանանակինան։
«Ձկան յուղը գլխավորում է մարդու առողջության պահպանման համար անհրաժեշտ սննդանյութերի ցանկը: Ամենամեծ քանակությամբ այն հանդիպում է յուղոտ ձկան մեջ՝ սաղմոն, սարդին, իշխան, թունա, սկումբրիա։ Ձկան յուղը հարուստ է օմեգա-3 ճարպաթթուներով, որոնք կարևոր դեր են խաղում մարմնի բազմաթիվ գործառույթներում։ Ձկան յուղի օգտագործումը նպաստում է սրտի և ուղեղի աշխատանքին, նվազեցնում է արյան մեջ տրիգլիցերիդների քանակը, նվազեցնում է բորբոքումները, բարելավում է հոգեկան վիճակը, պահպանում է մաշկի առողջությունը, պաշտպանում է հոդերը և ոսկորները»,-նշել է մասնագետը։
Բժիշկը նշել է նաև, որ հղիներին անհրաժեշտ է ձկան յուղ, քանի որ այն բարերար է ազդում հղիության ընթացքի և պտղի զարգացման վրա։
«Սակայն այն ընդունելիս արժե պահպանել միջոցը՝ վնասակար հետևանքները կանխելու համար։ Օրգանիզմում ձկան յուղի ավելցուկը կարող է հանգեցնել արյան շաքարի մակարդակի բարձրացման, արյունահոսության ռիսկի բարձրացման, ինչպես նաև առաջացնել փորկապություն և սրտխառնոց»,- զգուշացրել է Տանանակինան:
Միևնույն ժամանակ, ըստ էնդոկրինոլոգի, այն մարդիկ, ովքեր շաբաթական գոնե մեկ անգամ ձուկ են ուտում, ավելի քիչ են հակված սրտանոթային հիվանդությունների՝ ի տարբերություն նրանց, ովքեր հազվադեպ կամ երբեք չեն ուտում ծովամթերք։
Ինչպես պարզաբանել է բժիշկը, ավելի լավ է շաբաթական երկու անգամ ձուկ ուտել եփած կամ թխած վիճակում. այս կերպ բոլոր օգտակար տարրերն ավելի լավ են պահպանվում։ Եթե դուք կանոնավոր կերպով բավարար քանակությամբ ծովամթերք չեք ուտում, կարող եք ձկան յուղի հաբեր ընդունել: Բայց մինչ այդ դուք պետք է խորհրդակցեք ձեր բժշկի հետ։
Ձկան յուղը պարունակում է էական ճարպաթթուներ, որոնք օրգանիզմը չի կարող ինքնուրույն արտադրել։ Հետևաբար, մարդը պետք է դրանք ընդունի ձուկ ուտելով կամ սննդակարգում ձկան յուղ ավելացնելով»,- ամփոփել է Տանանակինան։
