Արթուր Դավթյանի հաջողությունը թիմային համատեղ աշխատանքի արդյունք է. Գագիկ Վանոյան
Հայաստանի մարմնամարզության ֆեդերացիայի նախագահ Գագիկ Վանոյանը Արթուր Դավթյանի երկու անընդմեջ ոսկե մեդալները աշխարհի գավթի խաղարկությունում համարում է թիմային աշխատանքի արդյունք:
«Արթուրն աշխարհի երկու փուլերում ոսկե մեդալներ նվաճեց` մեզ երջանկության ակնթարթներ պարգևելով: Շնորհակալություն նրան դրա համար: Արթուրի արդյունքը թիմային համատեղ աշխատանքի արդյունք է»,-«Արմենպրես»-ի մամուլի սրահում լրագրողների հետ հանդիպման ժամանակ ասաց նա:
Վանոյանի խոսքով` Կատար այցի ընթացքում նա հանդիպում է ունեցել Մարմնամարզության միջազգային ֆեդերացիայի փոխնախագահ, Կատարի մարմնամարզության ֆեդերացիայի նախագահ՝ Ալի Ալ-Հիթմիի հետ և հրավիրել նրան Հայաստան: Հնարավոր այցելությունը նախատեսված է մայիսին, որի ընթացքում Երևանում կարող է անցկացվել պատանեկան միջազգային մրցաշար:
Հայաստանի մարմնամարզության թիմը Գերմանիայում և Կատարում կայացած աշխարհի գավաթի խաղարկությունների երկու փուլերում ընդհանուր առմամբ 4 մեդալ նվաճեց: Արթուր Դավթյանը երկու ոսկե մեդալ նվաճեց հենացատկում, Գագիկ Խաչիկյանը դարձավ Կոտբուսի գավաթի նժույգ-թափերի վարժության արծաթե, իսկ Արթուր Ավետիսյանը՝ օղակների բրոնզե մեդալակիր:
