«Սուրմալու» առևտրի կենտրոնի ողբերգական պայթյունի գործով կալանավորված երեք անձանցից մեկը գրավի դիմաց ազատ է արձակվել. որևէ պաշտոնատար անձ առ այս պահը մեղադրյալի կարգավիճակ չունի
«Սուրմալու» առևտրի կենտրոնի ողբերգական պայթյունի գործով կալանավորված տնտեսվարողներից մեկի խափանման միջոցը փոխվել է, նա գրավի դիմաց ազատ է արձակվել։ Այս մասին «Փաստինֆո»-ի հետ զրույցում հայտնեցին ՀՀ քննչական կոմիտեից։
Հիշեցնենք, որ օգոստոսի 14-ին, ժամը 13։23-ին Ճգնաժամային կառավարման ազգային կենտրոն ահազանգ է ստացվել, որ Երևանի Արշակունյաց 15 հասցեում գտնվող «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ, եռհարկանի շինությունը մասնակի փլուզվել է։ Պաշտոնապես հայտնի է, որ ողբերգական դեպքի հետևանքով զոհվել է 16 քաղաքացի, այդ թվում՝ մանկահասակ երեխա և հղի կին, ևս մեկ քաղաքացի այս պահին համարվում է որպես անհետ կորած։
Պայթյունի դեպքի առթիվ նախաձեռնվել է քրեական վարույթ՝ ՀՀ ՔՕ 357-րդ հոդվածի 2-րդ մասի (Հրդեհային անվտանգության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետեւանք) եւ 358-րդ հոդվածի 2-րդ մասի (Դյուրավառ կամ այրիչ նյութերի պահպանման, հաշվառման, փոխադրման, առաքման կամ օգտագործման կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետեւանք) հատկանիշներով։
Դատախազությունից տեղեկացրել են, որ քննիչի համապատասխան որոշմամբ ՀՀ քաղաքաշինության տեխնիկական և հրդեհային անվտանգության տեսչական մարմնից առգրավված փաստաթղթերի ուսումնասիրությունից պարզվել է, որ արձանագրված խախտումների վերացման վերջնաժամկետից հետո նոր ստուգումներին և կանխարգելիչ միջոցառումներին ուղղված որևէ գործողություն չի իրականացվել: Մինչդեռ, «Սուրմալու» առևտրի կենտրոնում իրականացված ստուգումների արդյունքում արձանագրվել են հրդեհային անվտանգության կանոնների բազմաթիվ խախտումներ, որոնք արդեն իսկ հրդեհի առաջացման պատճառ են հանդիսացել: Ավելին՝ Երևանի դատախազը միջնորդագիր է ներկայացրել՝ «Երևանի պահածոների գործարան» ՓԲԸ-ի գործունեությունը դադարեցնելու վերաբերյալ։
Վարույթի շրջանակներում ձերբակալվել էր չորս անձ, որոնցից երկուսը՝ ՀՀ քրեական օրենսգրքի 357-րդ հոդվածի 2-րդ մասի (հրդեհային անվտանգության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք), մյուս երկուսը՝ 165-րդ հոդվածի 2-րդ մասի (անզգուշությամբ երկու կամ ավելի անձանց կյանքից զրկելը) հատկանիշներով։
Ձերբակալվածների թվում է եղել «Երևանի պահածոների գործարան» ՓԲ ընկերության փոխտնօրենը, որին մեղադրանք է առաջադրվել ՀՀ քրեական օրենսգրքի 357-րդ հոդվածի 2-րդ մասով՝ առևտրի կենտրոնում հրդեհային անվտանգության կանոնները խախտելու համար, որն անզգուշությամբ առաջացրել է մարդու մահ կամ այլ ծանր հետևանք։ Նրան կալանավորելու միջնորդությունը դատարանը մերժել էր:
Գործով կալանավորվել էին ձերբակալված մյուս երեք անձինք, որոնք եղել են պահեստը շահագործողները. Նրանցից մեկը նույնպես մեղադրվում է ՀՀ քրեական օրենսգրքի 357-րդ հոդվածի 2-րդ մասով, մյուս երկուսը մեղադրվում են ՀՀ ՔՕ 165-րդ հոդվածի 2-րդ մասով՝ երկու կամ ավելի անձանց անզգուշությամբ կյանքից զրկելու հատկանիշներով։
ՔԿ-ից «Փաստինֆո»-ի հետ զրույցում հայտնեցին, որ այս պահիի մեղադրյալները չորսն են, կալանավորված երեք անձանցից մեկի խափանման միջոցը փոխվել է, նա գրավի դիմաց ազատ է արձակվել։
Վարույթի շրջանակներում տուժողի կարգավիճակ ունի 90 անձ, որոնցից 55–ը մարմնական վնասվածք ստացածներն են, 35–ը` ֆինանսական:
Փաստացի առ այս պահը որևէ պաշտոնատար անձի, այդ թվում, ՔՏՀԱ ՏՄ աշխատակցի մեղադրանք չի առաջադրվել՝ ողբերգական դեպքի համար։
Հեղինակ՝ Իզաբել Սահակյան
