Անփոփոխ հեռախոսային զրուցընկերը․ Նիկոլ Փաշինյանի միջպետական հեռախոսազրույցների վիճակագրությունը․ «Իրազեկ քաղաքացիների միավորում»
Sorry, this entry is only available in Armenian and Russian.
Հայաստանի վարչապետ Նիկոլ Փաշինյանը վերջին շրջանում բավական ինտենսիվ հեռախոսային կապի մեջ է Ռուսաստանի նախագահ Վլադիմիր Պուտինի հետ:
Ընդհանրապես, ուսումնասիրելով երկրի ղեկավարի պաշտոնական հեռախոսազրույցների վերաբերյալ տվյալները, կարելի է որոշակի պատկերացում կազմել կոնկրետ ժամանակաշրջանում տեղի ունեցող զարգացումների, առաջնահերթությունների և մարտահրավերների մասին:
Նախկինում մեր այս երկու հրապարակումներում (առաջին, երկրորդ) արդեն անդրադարձել ենք Նիկոլ Փաշինյանի պաշտոնավարման ընթացքում տեղի ունեցած պաշտոնական հեռախոսազրույցներին: Այս հրապարակմամբ կշարունակենք վեր հանել հեռախոսազրույցների վիճակագրությունը՝ սկսելով վերջին հրապարակման օրից: Ըստ այդմ, ստորև ներկայացված է Նիկոլ Փաշինյանի պաշտոնական հեռախոսազրույցների վիճակագրությունը՝ 2021 թվականի փետրվարի 16-ից մինչև սույն հոդվածի հրապարակման պահը:
Ընդհանուր տվյալներ
Համաձայն ՀՀ վարչապետի պաշտոնական կայքի հաղորդագրությունների՝ ուսումնասիրվող ժամանակահատվածում Նիկոլ Փաշինյանն ունեցել է 54 հեռախոսազրույց:
Դրանցից 24-ը ՀՀ վարչապետն ունեցել է Ռուսաստանի Դաշնության նախագահ Վլադիմիր Պուտինի հետ: Փաշինյանի հաջորդ ամենահաճախ հեռախոսային զրուցակիցներն են Ֆրանսիայի նախագահ Էմանուել Մակրոնն ու ԱՄՆ պետքարտուղար Էնթոնի Բլինքենը՝ 5-ական հեռախոսազրույց:
Փաշինյանը բավական հաճախ է հեռախոսազրույցներ ունենում նաև Վրաստանի վարչապետ Իրակլի Ղարիբաշվիլիի, Ղազախստանի նախագահ Կասիմ-Ժոմարտ Տոկաևի, իսկ վերջին շրջանում՝ Եվրոպական խորհրդի նախագահ Շառլ Միշելի հետ (3-ական անգամ):
Բացի դա, Փաշինյանը նշված ժամանակահատվածում երկուական հեռախոսազրույցներ է ունեցել Բելառուսի նախագահ Ալեքսանդր Լուկաշենկոյի ու Իրանի նախագահ Էբրահիմ Ռայիսիի հետ: Վարչապետը հեռախոսազրույցներ է ունեցել նաև Ղրղզստանի նախագահի, Թուրքմենստանի՝ իրար հաջորդած նախագահներ հայր ու որդի Բերդիմուհամեդովների, Ղազախստանի վարչապետի, Կանադայի վարչապետի, Ռուսաստանի վարչապետի, ԱՄՆ նախագահի ազգային անվտանգության հարցերով խորհրդական Ջեյք Սալիվանի և Կարմիր խաչի միջազգային կոմիտեի ղեկավարի հետ:
Առիթներ
Նշված ժամանակահատվածը լի էր Հայաստանի համար բավական ծանր փորձություններով և միջազգային տարբեր ցնցումներով:
Նախ, անցած տարվա մայիսին Ադրբեջանը ներխուժեց Հայաստանի սուվերեն տարածք՝ Սյունիքի և Գեղարքունիքի մարզերում: Ցանկանալով ստանալ իր անվանական դաշնակիցների աջակցությունը՝ Հայաստանը դիմեց Հավաքական անվտանգության պայմանագրի կազմակերպություն: Ողջ այդ գործընթացը, բնականաբար, ուղեկցվում էր ակտիվ հեռախոսային քննարկումներով: Մասնավորապես, մայիսյան լարվածության ֆոնին ՀՀ վարչապետը հեռախոսազրույցներ է ունեցել Պուտինի (2 անգամ), Մակրոնի, Սալիվանի, Բելառուսի ու Ղրղզստանի նախագահների հետ:
Հեռախոսազանգերի ակտիվությունը հաջորդ անգամ մեծանում է 2022 թվականի հունվարին՝ նույնպես ՀԱՊԿ համատեքստում, այս անգամ՝ կապված Ղազախստանում զանգվածային անկարգությունների և դրանց պատճառով այդ երկրի՝ ՀԱՊԿ դիմելու որոշման հետ: Այդ պահի դրությամբ ՀԱՊԿ նախագահող երկիրը Հայաստանն էր՝ ի դեմս վարչապետ Փաշինյանի: Վերջինս Ղազախստանում իրադարձությունների և այնտեղ ՀԱՊԿ խաղաղապահներ ուղարկելու գործողությունների ֆոնին երկուական անգամ հեռախոսազրույցներ է ունենում Ղազախստանի ու Ռուսաստանի ղեկավարների հետ: Բացի դա, նույն ժամանակահատվածում Փաշինյանը հեռախոսազրույց է ունենում նաև Վրաստանի վարչապետի հետ:
Ուշագրավ է, որ 2022 թվականի փետրվարի 24-ին Ուկրաինայի դեմ Ռուսաստանի սկսած պատերազմից ի վեր Պուտինն ու Փաշինյանն ունեցել են 7 հեռախոսազրույց: Բացի դա, նույն ժամանակահատվածում ակտիվացել էին դիվանագիտական գործընթացները Հայաստանի ու Ադրբեջանի միջև եվրոպական միջնորդությամբ՝ ի դեմս ԵԽ նախագահ Շառլ Միշելի: Այս ձևաչափով եռակողմ հանդիպումներից հետո տեղի են ունեցել հեռախոսազրույցներ ՌԴ նախագահ Վլադիմիր Պուտինի հետ: Ինչպես նաև նույն ժամանակահատվածում՝ 2022 թվականի ապրիլ-մայիսին, Փաշինյանը հեռախոսազրույցներ է ունեցել նաև Բլինքենի ու Շառլ Միշելի հետ:
Ամփոփելով՝ հարկ է նշել, որ առկա վիճակագրությունը փաստում է Հայաստանի արտաքին քաղաքականության մեջ որոշակի ակտիվության մասին, իսկ Հայաստանի ղեկավարի հիմնական հեռախոսային զրուցընկերը շարունակում է մնալ Ռուսաստանի նախագահը:
Վահե Ղուկասյան
«Իրազեկ քաղաքացիների միավորում»
